kræftimut katersuiniarneq
K. Jeremiassen: Maajussaarineq atorlugu pujortartarneq akiorneqarli
Nunatsinni puatsigut kræfteqarnermi pujortartarneq pissutaanersaavoq. Inatsisartuni ilaasortap siunnersuutigaa maajussaarinikkut pujortartarnerup akiorneqarnissaa
Arfininngornermi kræfti akiorniarlugu suliniaqatigiiffik Neriuffik nuna tamakkerlugu katersuiniassaaq KNR-TV-kkut nalunaaqutaq 20.00 aallakaatinneqartussamik. Maanna inatsisartuni ilaasortaq Kristian Jeremiassen siunnersuuteqarpoq puakkut kræfteqartarnerup akiorniarneqarnerani sakkortunerusumik periuseqarnikkut akiuiniartoqarnissaa.
Inuit 195-ip nunatsinni 2011-mi kræftimik nappaateqartut kisitsit kingulliit takutippaat. Nakorsaaneqarfiup pingaartumik puakkut kræfteqartarneq isumakulunnartoqartippaa tassanilu pujortartarneq pissutaakkajunneruvoq. Inatsisartut upernaamut katersornissaannut Kristian Jeremiassen siunnersuuteqarpoq cigarettit puuini maajussaarutit atorneqalernissaannik.
- Amerlavallaaqaat kræfti pissutigalugu annaasakkavut. Taamaattumik siunnersuutigaara Danmarkimisut cigarettit puuini assit maajunnartut atorneqalernissaat, Kristian Jeremiassen Sermitsiaq.AG-mut oqarpoq.
2012 aallartiffigalugu Danmarkimi cigarettit puuini assit maajussaarutit atorneqalerput, tamannali Nunatsinni atorneqanngilaq.
- Siunissaq ungasinnerusoq eqqarsaatigalugu peqqinnissaqarfik aningaasarpassuarnik aamma sipaartussaavoq pujortartartut ikilisinneqarsinnaappata. Inuk ataaserluunniit pujortarunnaarsissinnaagutsigu ajussanngeqaaq sulilu pitsaanerussalluni suli amerlanerit pujortarunnaarsinnaappata, Kristian Jeremiassen oqarpoq.
Upernaakkut katersorneq martsip 18-at aallartissaaq.