Nukissiorfiit

K. Jeremiassen: Kalaallisuinnaq allattalerpunga

Inatsisartunut siunnersuut oqaluuserisassanngortinneqanngilaq qallunaatuua kukkuneqarmat

Nukissiorfiit namminersortunngorsarnissaannik Kristian Jeremiassenip siunnersuutaa oqaluuserisassanut ilanngunneqanngilaq qallunaatuua kukkuneqarmat

Nukissiorfiit namminersortunngorsarnissaannik Siumumeersup Kristian Jeremiassenip siunnersuutaa Inatsisatut upernaamut katersorneranni oqaluuserineqassanngilaq. Inatsisartut allattoqarfiat oqaluuserisassanut ilanngunnissaanut itigartitsivoq qallunaatoortaa kukkuneqarmat. Kristian Jeremiassen siunissami Inatsisartunut siunnersuuteqaraangami kalaallisuinnaq allattalerniarpoq.

Nukissiorfiit namminersortunngorsarnissaannik siunnersuunni upernaamut inatsisartut katersornissaannut siunnersuutinik tunniussaqarnissamut killissarititaasup qaangiutinnginnerani tunniuppaa. Maannali Kristian Jeremiassen Inatsisartut allattoqarfiannit ilisimatinneqarpoq oqaluuserisassatut siunnersuutaa ilanngunneqarsinnaanngitsoq. Itigartitsinermut tunngavilersuutaavoq siunnersuutip atuutilerfissaatut ulloq kalaallisuuani taamaallaat allassimammat.

Atuutilerfissaa uniffiuvoq
- Pisimasoq assorujussuaq ajuusaarnarpoq pingaartumik eqqarsaatigigaanni siunnersuutip atuutilerfissaa kalaallisuuani allaqqasoq. Maanna tassa itigartinneqarpoq qallunaatuuani kukkuneq pissutigiinnarlugu, Kristian Jeremiassen Sermitsiaq.AG-mut oqarpoq.

Pisimasoq tamanna kinguneqartinniarlugu maanna aalajangerpoq.

- Maanna aalajangerpunga siunissami siunnersuutinik saqqummiussaqaraangama kalaallisuinnaq allattarniarlunga, Kristian Jeremiassen oqarpoq.

Kristian Jeremiassen siunnersuutip kalaallisuuani allappoq Nukissiorfiit 2015-mi januarip aallaqqaataani namminersortunngornissaat siunnersuutigalugu, piffissarli taanna qallunaatuuaani allaqaangilaq.

Nukissiorfiilli namminersortunngorsarnissaat upernaamut Inatsisartut oqaluuserissavaat namminersortunngorsaanerup pitsaaqutai sanngeequtaalu pillugit nalunaarut Naalakkersuisut saqqummiutissammassuk.

Inatsisartut upernaamut katersornerat martsip 18-at aallartissaaq.

Powered by Labrador CMS