Juuna pikkori
Qallunaaq sikkilertartoq Jonas Vingegaard, 11. etapemi ajugaanermi kingorna Tour de Francemi maanna minutsinik marlunnik sivisunerusumik siuttuuvoq.
Tour de Francemi pingasunngornermi 11. etapemi qallunaap sikkilertartup Jonas Vingegaardip unammisut tamaasa inissippai.
Qummukajaami kingullermi saassussinermi, Col du Granonimi, Jonas Vingegaardip Tadek Pogacar qaangerlugu siuttup tujuulua sungaartoq pissarsiaraa.
Vingegaard kisimiilluni apuuffissamut apuuppoq, Tour de Francemilu etapemi siullermeerlunilu ajugaalluni ajugaasup tujuuluaraanik pissarsivoq.
Piumassuseqaallannermilu aamma ajugaaneq kalaallit ajugaanerannik oqaatigipajaarneqarsinnaavoq. Tassami Jonas Vingegaardip aappaa Bagedystimit tusaamasap Rosa Kildahlip panigaa, taassumalu ataatavia kalaaliuvoq Qaqortumeersoq. Paneqarpoq Frida.
2007-mili siullermeerluni qallunaamik Tour de Francemi ajugaasup tujuuluaraanik sungaartumik pissarsisoqarpoq. Taamanikkut Michael Rasmussenip tujuuluaraq pissarsiaraa. Qallunaat katillutik arfineq-marluk oqaluttuarisaanermi ajugaasup tujuuluaraanik pissarsisimalerput.
Vingegaard aatsaat aappassaanik Tour de Francemut peqataavoq. Siorna angusat katinneranni kikkut tamaasa tupaallatsillugit ajugaasup tulliatut inissippoq, Tadej Pogacar ajugaasoq.