Skip to main content

Juullip Inuata pigisai pilerngunneqarput

Nuuk Tourismip akiliisinnaajunnaarnerata kingorna akiliisinnaajunnaartup pigisai akitsorterussinikkut tuniniarneqarput

(Artiklen blev oprindeligt bragt i Sermitsiaq i november 2011.)

– Biili usisaatilik eqqaamaviuk, Konrad?

Alianartumik quianartunngortitsiniartoqarpoq akiliisinnaajunnaartup Nuuk Tourismi pigisai marlunngormat ualikkut akitsorterussinikkut tuniniarneqarput.

Alapernaatsut pisinialluunniit 45-t missaanniittut takornariaqarnermik ingerlatsiviup akiliisinnaajunnaartup initaanut juullimut pinnersarneqarsimasunut takkupput. Saaffiginnittarfimmi, nalinginnaasumik takornariat angalanernik imaluunniit juullip inuanik tammajuitsussanik pisiniat saaffiginnittarfianni, nikorfalluni akiliisinnaajunnaartup pigisaanik paarsisup, eqqartuussissuserisup Britta Keldsenip akitsorterussineq ammarpaa.

– Tamaasa tunissavagut isertuussaanngilarlu aningaasarsiutigerusukkivut!, taanna aallarniivoq.

Koorini juullip kuulii kuultitut qaammaallattartut, allarutit nunatta assinganik assiliartallit, postkortit juullip inuanik assiliartallit, kusukkat plastikkit, qipisat, trangiasæt-it, sisoraatit pisoqqat, annoraaminernik puiaasat, tarajuaraasiviit Thulemandimik assitallit, quppersakkat ikittaatillu 20.000-t Nuuk Tourismip ilisarnaataanik aappalaartumik assiliartallit. Tamarmik tuniniarneqarput.

– 100 koruunit!, siulleq neqerooruteqarpallappoq.

Akia qaffariartupallappoq.

– 1300 koruunit!

–  2000 koruunit!

Aallartitsisoq Mette Lynge, Anori Art-imeersoq, inorsiivoq 2600 koruuninik neqerooruteqarluni.
–    Tunineqarpoq, paarsisoq oqarpoq tv-lu fladskærmi nivinngarfilik ornillugu. Amerlasuut tupaallaatigisaannik 2600 koruunilerlugu tunineqarpoq.

Isumaqatigiissut atorsinnaanngitsoq uumasuusaartitsivoq
Takkuttut ininut tamanut angalaarput tuniniakkat akitsorterussutigineqalinnginneranni nalilersorniarlugit. Allaffiit inoqanngillat. Nerrivimmi allaffimmiipput assiliivik digitali uummammillu aallartitsissut. Teqeqqumiippoq aningaaserivik qasertoq matua ammasoq. Pappiaqqat imusat qalipaatigissut 100 missaanniittut aningaasat puui nalingi allassimasut takussaapput. Tamarmik imaqanngitsut naleqanngitsullu.

Nuuk Tourism oktobarip 28-ianni akiliisinnaajunnaarpoq. Tamanna pivoq Unammillernermut Ataatsimiititaliap Kommuneqarfik Sermersuumik sullissinissamik isumaqatigiissut unammillernermik equtitsisutut oqaatigimmagu. Isumaqatigiissut Nuuk Tourismip ukiuni 15-ini atorluarsimavaa, 2010/2011-imilu ukiut nikinneranni atorunnaarmat isumaqatigiissut 900.000 koruuninik naleqarsimavoq.

Eqqartuussivimmi ataatsimiinnermi ilanngullugu saqqummiunneqarpoq eqqartuussissuserisup Britta Kelsenip Nuuk Tourismip siulersuisui sinnerlugit taamanikkut pisortaasimasoq Therese Kreutzmann politiinut suliassanngortissimagaa.

Therese Kreutzmann Sermitsiamut oqanikuuvoq tamatumani pineqartoq »annikinnerusumik aaqqiagiinngissutit koruuninik untritialunnguanik annertussusilik«, USA-mi umiarsuarnik takornariartaatinik ussassaarinermi angalanermut atatillugu.

Suliffiit 50-t
2006-imi Nuuk Tourismip Santa Claus Foundation-imut pisinnaatitaaffiit Tele Greenlandimit pisiarai. Tamakkununnga ilaaapput juullip inuata allakkanut nakkartitsivia, sutsinut napasuliaq juullillu inuata allaffia. Suliassaq artornartuusimavoq. Akiliisinnaajunnaarnermi inini tunorlerniipput puussiarsuit qernertut juullip inuanut allakkanik untritilikkaanik imallit, nunarsuarmit tamarmit angajoqqaat akissuteqarfigeqqullugit ataaseq 55 koruuninik akilertarsimasaat.

– Una sunaana?, angutit pingasut cafemut misissuerpasillutik isigisut ilaat aperivoq.

 – cafe latte-maskiinap kingoraartissargunarpaa, ilaata akivaa akitsorterussinermut utinnginnerminni.

Igalaap saavaniippoq scrapbogi, aviisinit qiukkanik sungaartunngulersimasunik imalik.

– Finskeq unammillertini peersereerlugu kalaallit juullip inuata nunarsuarmi juullip inuppiaatut kisiartaanini naqissusernialeruttorpaa. Aappaagu juullip inuata sannavia piariissaaq, naatsorsuutigineqarporlu ukiut tallimat ingerlaneranni suliffiit 50-t pilersinneqarsimassasut kaaviiaartitallu ikinnerpaamik 50 millioner koruuniussasut, jullip inuanik suliniummi isortaq Preben Larsen 1991-imi Jyllands-Postenimut oqarpoq.

Atuagaq tikeraat allaffigisartagaat titartakkanik inuulluaqqussutinillu ulikkaarpoq. Ilaatigut ukioq manna Noah-mit 8-nik ukiulimmit:

– Hej, Juullip Inua, Nuummiinera nuannaraara qanittukkullu uternissara kissaatigaara, Noah allassimavoq.

Tukkusooq avannamut nuuppoq
Tammajuitsunik pisiniarfiusimasumi akitsorterussineq naammassiartulerpoq. Maanna allaffimmi pequtit it-milu atortut  tuniniarneqassapput.

– Qaa, pequtitsialaapput, Britta Keldsen kajumissaarivoq.

Akia 9500 koruuninut killippoq. Kissarsuut qernertoq pilerigineqarneruvoq. Taanna 5100 koruunilerlugu tunineqarpoq. Aammaarluni Mette Lyngemut.
Ulloq naammat akiliisinnaajunnaartup pigisaanik paarsisoq naammagisimaarinnipoq. Britta Keldsen oqarpoq siumut pigisanik naliliisimanerminit aningaasat amerlanerusut isertissimallugit.

Juullip Inuata ajaappiaa qilalukkap qernertap tuugaava, allakkanik nakkartitsivik plastikkimillu orpiliaq portusooq akitsorterussunneqanngillat. Pigisat tamakkua Destination Avannaa-ta sapaatip akunnerani kingullermi pivai, takornariaqarnermik ineriartortitsinermik selskabip nunatsinni juullip inuanut pisinnaatitaaffiit 150.000 koruunierlugit pisiarigamigit.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER