Juullip eqqissisimanartua sapaatip-akunnerani ataatsimi marloriarluni serlersaarisoqarsimaneranit ajoquserneqartoq
Nuummi juullimut niuffatsitsillunilu orpilissanik tuniniaaffiusoq sapaatip-akunnerani ataatsimi marloriarluni serlersaariffigineqarsimavoq.
Nuup qeqqani juullimut niuffaffimmi ukiumi immaqa sapaassuit nuannernerpaavanni atugassamik orpilissamik pissarsisoqarsinnaavoq.
- Niuffaffik najorlugu nuannerluinnartoq isumaqarpugut, aamma takornariartitsisartutut suliffeqarfittut ukiukkut takornariaqannginnerani aningaasanik isaatitsinissaq pisariaqartittarparput, Greenland Escapemik piginngittoq juullimullu niuffaffimmik aallartitsisimasoq Jesper Skjoldborg Øraker Sermitsiaq.AG-mut oqarpoq.
Illoqarfiit pingaarnersaanni inuppassuit juullimut niuffaffik novembarimi ammarneqarmalli iserfigisarsimavaat, ajoraluartumilli inuit ilaat unnuakkut "pisiniarnissaminnik" aalajangersimapput, Greenland Escapellu Nuup Qeqqaniittumi Puisaasaliap eqqaanniittumi illuaqqamut namminneerlutik isertarsimallutik.
- Taamatut ittunut piffissamik, nukitsinnik aningaasaatitsinnillu aamma pigisatta eqqissisimatinneqannginnerannut atuisariaqarnerput assut ajuusaarnarpoq, taanna oqarpoq.
Sapaatip-akunneranut marloriarluni serlersaarisoqarsimasoq
Ullumi tallimanngornerup unnuaani igalaaq aseroriarlugu qinnilersuut tillinneqarsimavoq, Jesper Skjoldborg Øraker oqaluttuarpoq.
Tamannali ajorpaajunngilaq. Sapaatimmi-akunnerani ataasiinnarmi aappassaanik taamatut pisoqarpoq.
Marlunngornerup unnuaani orpilissanik tuniniaasoq sulisumit nalunaaqutaq marlup eqqaani itersarneqarsimavoq, sulisup oqaluttuarisimavaa illuaqqami serlersaarisoqarsimasoq. Tassani aamma igalaaq aseroriarlugu karsi imaqanngitsoq tillinneqarsimavoq.
- Karip aappa Saviminilerinermik Ilinniarfimmiunit nassaarineqarsimavoq, taanna tigoqqereerparput. Karsip aappa suli nassaarineqanngilaq, Jesper Skjoldborg Øraker oqaluttuarpoq.
Suliffeqarfik taamaalilluni sapaatip-akunnerata ingerlanerani aappassaanik igalaamik iluarsaassisariaqarsimavoq qinnilersuummillu nutaamik pisisariaqarsimalluni.
Sulinissamut kajuminnarunnaarsitsisoq
Aningaasarpassuit pineqanngikkaluartut, taamaattoq suliffeqarfimmut sulisunullu tamanna sunniuteqarpoq, piginnittoq oqarpoq.
-Juullimut niuffatsitsiniarnermik serlersaarisoqarnissaanik tillinniartoqarnissaanilluunniit ernumassuteqarani ingerlatsiniarluni tamanna assut uuminarpoq. Taamatut suliaqaqqinnissamut kajumissuseerutsitsinnaavoq.
Suliniuteqartup erseqqissaassutigaa, innuttaasut amerlanersasa neqeroorut nuaannarlutik atorsimagaat.
- Inuit tigulluarpaatigut niuffatsitsinerpullu pillugu nersortarluta. Inuit ikittunnguit taamatut ajoqusiisarnerat assut uuminarpoq.
Politiit Sermitsiaq.AG-mut ilisimatitsissutigaat, marlunngornerup tallimanngornerullu unaanni pisimasut pillugit suliamik aallartitsisoqarsimasoq pisimasullu suli misissuiffigineqartut, sulili tigusarinnittoqarsimananilu pasisaqartoqanngilaq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...