Juullimi tillinniarfigitissinnaaneq pinngitsoortiguk
Kalaallit Nunaanni Politiit juullimi angerlarsimanianngitsut tamaasa kaammattorpaat, tillinniarfigitissinnaaneq pinngitsoortinniarlugu immikkut ittumik iliuuseqaqqullugit.
Juullimi inuppassuit angerlarsimaffitsik inuerullugu ikinngutiminni ilaqqutaminnlu juullisiortarput. Init inoqanngitsut tillinniarfigissallugit ajornanngitsunnguusarpoq, Kalaallit Nunaanni Politiit allapput.
Kalaallit Nunaanni Politiit angerlarsimaffivit tillinniarfigineqannginnissaa qanoq qulakkeersinnaanerit pillugu pitsaasunik ajornaatsunillu siunnersuuteqarput:
Angerlarsimanngikkaangavit matup parnaaqqatinnissaa igalaallu matoqqatinnissaat tamatigut eqqaamasaruk.
Feeriarlutit aallassaguit inigisavit nakkutigineqarnissaa pillugu eqqaamiunnut isumaqatigiissusiorit.
Angerlarsimasoqartutut isikkoqalersillugu qullernik ikumatitaqarait imaluunniit nalunaaquttamik qullernik ikitsillunilu qamitsisinnaasunik atugaqarit. Eqqaamiutit aputaajaatittarlugillu eqqagassanik igitsisittakkit.
Pigisatit nalillit ativit aallaqqaataanik atinnilluunniit ilisarnaasikkit, tillinniartoqassagaluarpat politiit takusinnaaniassammassuk tillitat illit pigigitit.