ikiuineq
Juulli qanilliartorpoq
Kalaallit Røde Korsiat juullimi ilaqutariit meerartallit ikiornissaannut ikiorneqarnissaminik pisariaqartitsivoq
Nuummi Kalaallit Røde Korsiat ilaqutariinnut meerartalinnut aningaasarsiakitsuararsuarnut juullimi ikiuisarpoq.
Tamakkua tassaagajuttarput kisermaat pilersugallit ilaqutariillu meerartallit.
– Ukioq manna kommunip Inersimasunik Isumassuinermut immikkoortoqarfia isumaqatigiissuteqarfigaarput Nuummi ilaqutariit, piumasaqaatitsinnik naammassinnittut, pingaartumik sammillugit ilaqutariit sivisuumik pisortanit ikiorsiissutinik pisarsimasut, allattorsimaffiat pissagipput, Nuummi Kalaallit Røde Korsianneersoq Kirsten Mortensen paasissutissiivoq.
Ikiuutit siullerpaamik tassaasarput meeqqanut tunissutissat, angajoqqaalli aamma aningaasanik annikitsunnguanik ikiorneqartarput.
Nuummi Kalaallit Røde Korsiata ukioq manna ilaqutariit, aningaasaqarniarnikkut ajornartorsiortut, sapinngisamik amerlasuut ikioqqinniarpai. Juullimi ikiorserneqarnissamik qinnuteqartut ukiut tamaasa amerliartortarsimapput.
– Siorna qinnuteqartut ikiortariaqartut tamaasa ikiorniarlugit tamaviaarsimavugut. Røde Korsip pisiniarfianit sinneqartoorutit aammalu qanittumit ungasissumillu tunissutit pissutigalugit siorna poortukkat 300.000 koruunit sinnerlugit nalillit agguaanneqarput, Kirsten Mortensen paasissutissiivoq.
– Ukioq manna tunisisut amerlanerusut pisariaqartippavut, ajorsarneq annikilleriarsimanngimmat.
Taamaattumik Kalaallit Røde Korsiat ingerlatsivinnut tamanut allanullu allagaqarsimavoq ilaqutariit meerartallit ikiortariaqartut ikiornissaannut ikioqqullutik.
– Tunissutit tamaasa qujarutissavagut, aningaasallu Grønlandsbankimi kontumut 6471-0007658785 ikineqarsinnaapput. Tunisisut nittartakkatsinni eqqaaneqassapput, tamanna piumanagu nalunaartoqanngippat. Ingerlatsiviit aamma ilisarnaatitik nittartakkatsinnut ilanngussinnaavaat, billedfil-itut uunga nassiukkunikku ksrk@krk.gl, Kalaallit Røde Korsiat paasissutissiivoq.
– Kiisalu Illit inuttut imaluunniit ingerlatsivik Kalaallit Røde Korsianni ilaasortanngorsinnaavusi, Kalaallit Røde Korsiat kajumissaarivoq, allakkanilu imatut aallartippai:
"Juulli qanilliartupiloorpoaq, taamatuttaarlu isumaliutit...
Kisermaarpassuit meerallit, suliffeqanngitsut allallu aningaasanik atugassakitsut, qitornamik juullimik nuannersumik, nerinertalimmik tunissutisinertalimmillu tuninissaannut aningaasassaaleqisarput".