Justus: Sooruna PET-p innuttaasut aalajangersimasut ilisimasanik tuniumanngikkai?
Politiit isertortumik paasiniaasartuisa, PET, Kina pillugu paasititsiniaalluni ataatsimiisitsinermut, inuussutissarsiornermik ingerlatsisut 25-t missaanniittut sisamanngornermi ualikkut peqataaffigisaannut tusagassiortut ilaaqqusaannginnerat, Demokraatit Nunanut allanut sillimaniarnermut politikkimut ataatsimiititaliamut ilaasortaatitaata Justus Hansenip tupigusuutigaa.
- Ataatsimiinneq pineqartoq eqqarsaatigalugu PET-p tunuarsimaarnini tulluarinngilaa, Justus Hansen isumaqarpoq, taassuma oqaatigaa ”ataatsimiinneq isertugaataanngilluinnartoq” tassani pineqartoq.
- Nunanut Allanut sillimaniarnermullu politikkimut ataatsimiititaliamut ilaasortatut Kina ataatsimiittarnitsinni initoorujussuuvoq. Taamaattumi PET-p ataatsimiinnerni kingullertigut pisuni suna nassuiaatigisimaneraa imaqarniliatut paasisaqarfiginissaa soqutigaara, Justus Hansen naqissusiivoq, taanna Inatsisartut upernaakkut ataatsimiinnerannut ammaanersiornermut peqaataanissaminut angumersinngilaq, timmisartorniarnera pingasunngormalli iluatsissimanngimmat.
Imaqarnilialiornissaq inerteqqutaanngitsoq
Sermitsiaq.AG-p inuussutissarsiornermik aqutsisut arlallit tassani ataatsimiinnermi Sulisitsisunit aaqqissuunneqartumi peqataasut oqaloqatigai.
- Isertuussiniakujunnersuaq taanna paasisinnaanngilara. Eqqaamasakka naapertorlugit imaqarnilialiornissaq inerteqqutaatinneqanngilaq. Akerlianik immiussisoqannginnissaa qinnuiginnissutigineqarpoq. Aamma misissueqqissaartartoq power pointinik saqqummeeqataasoq assileqqunqanngilaq, inuussutissarsiornermik aqutsisoq ataaseq taama nassuiaavoq, Sermitsiaq.AG-p taassuma kinaassusaa isertuutissallugu aalajangiussimavaa.
- Saqqummiussineq googlerlugit nassaarisinnaasanit nutaajunerusunik saqqummiivallaanngilaq, taanna oqarpoq.
Misilittagaqanngitsut
Sooq tusagassiortut ilaatinneqarsinnaannginnerat inuussutissarsiornermik aqutsisut paasisinnaanngilaa.
- Tamanna misilittagakinnerannik takussutissaavoq, taama nassuiaavoq.
Sulisitsisut aamma tallimanngornermi ilisimatitsipput, ”Sulisitsisut tusagassiortunik peqataasoqarnissaanik mattusisimanngitsut”.
Taamatut oqariartuuteqarneq allattoqarfiup pisortaata Karsten Lyberth Klausenip Sermitsiaq.AG-mim sulisumut SMS-ikkut allagaanut akerliulluinnarpoq, taanna ima allaqqavoq:
”Paasitinneqarpunga ualikkut ataatsimiinnermi tusagassiortut peqataasinnaanngitsut”.
Nassuiaat nutaaq
Sulisitsisut attaveqatigiinnermut pisortaa Erik Holmsgaard, sisamanngornermi allagarineqartup qanoq paasineqarnissaa ullumi nassuiarpaa:
- Ataatsimiinnerup aallartinngitsiarnerani issuaasoqannginnissaa imaluunniit assiliisoqannginnissaa nalunaarutigigaa paasissavat, taamaattoqanngippat PET-p ataatsimiinnermi peqataanini taamaatissammagu. Soorunami sms-imit pissarsiarisannit qimaasinnaanngilagut, kisianni PET-p oqaaseq tusagassiortut oqaatigisimaneraat nammineq nalornissutigaarput, Erik Holmsgaard allappoq.
PET-p issuaasoqarnissaanik imaluunniit ataatsimiinnermit assiliisoqannginnisaanik piumasaqaataa, ataatsimiinneq sioqqutilaarlugu nalunaarutigineqarmat, ataatsimiinneq ingerlanniarlugu aalajangiunneqarsimasoq, Sulisitsisut aamma ilisimatitsissutigaat.
Ammasuusoq
- Sulisitsisut ataatsimut isigalugu tusagassiorfinnut ammasuupput. Kisianni ataatsimiinnerit suliffeqarfiiit ilaasortaannut kisimi peqataaffigineqarsinnaasut avaqqunneqarsinnaanngillat, Sulisitsisut attaveqaqatigiinnermut pisortaat Sermitsiaq.AG-mut oqarpoq.