Justusi paatsiveeruttoq: Uumisaarinerungajapporluunniit
Kommuneqarfik Sermersuup Namminersorlutillu Oqartussat Nakkutilliisuisa paragraffit isumaqatigiinngissutigeqqippaat. Pisoq paatsiveerunnarsiartuinnarpoq, kommunimi politikkeri pisoq pillugu oqarpoq.
Siumumi politikkerip Inga Dora G. Markussenip siunnersuutimi itigartitsissutigineqarsinnaanera pillugu Kommuneqarfik Sermersuup eqqartuussissuserisumut naliliisitsisimanera sakkortuumik isorivaa.
Taannami isumaqarpoq, siunnersuut aningaasaqarnermut ataatsimiititamut saqqummiunneqartussaagaluartoq, kommuni aningaasanik eqqartuussissuserisumut atuitinnagu.
Aningaasaqarnermut Ataatsimiititami siulittaasup tulliata Justus Hansenip (D) Inga Dora G. Markusseni isornartorsiutaa isumaqatiginngilaa:
- Pisortaqarfiup taamatut periarfissaqartinneqartarnera nalinginnaasuuvoq. Tamanna arlaleriarlunga takusarsimavara. Inatsimmi malittussaavarput, aammali malittarisassat assigiinngitsumik paasineqartarnerat ajornartorsiutaavoq, Justus Hansen oqarpoq.
Taassuma oqaatigaa, qinikkat inatsisitigut assigiinngitsunik naliliisarnerat paatsuunganartupilussuuvoq.
- Ineqarnermut tunngatillugu suliami aamma taamatut ittoqarpoq, tassanimi inatsit qanoq paasineqassanersoq isumaqatigiinngissutigineqarpoq. Politikkeritut tamanna paatsiveerunnarsigaluttuinnarpoq, pisortanulli tatiginninnera suli attappara, matumani ajornartorsiutigineqartoq takusinnaanngilara.
- Uumisaarinerungajattorluunniit
Kommunalbestyrelsip februaarip 18-ani Inga Dora G. Markussenip oqaluuserisassanngoritaanik itigartitsinerata kingornatigut, Nakkutilliisut kommunalbestyrelsimi ilaasortanut allagaqarsimapput, tassani ilaasortat qinnuigineqarsimallutik oqaluuserisassanngortinneqarsimasumik qaqitseqqissasut, Nakkutilliisut isumaqarmata itigartitsisimaneq inatsisinik unioqqutitsinerusoq.
Apeqqut: Nakkutilliisut allakkammin oqaatigaat, suliaq naggataatigut kommunalbestyrelsimi ilaasortanut akiligassiissuteqarnermik nassatarsinnaasoq, tamatumunnga qanoq isumaqarpit?
- Tamanna takorluunngisaannarsimavara. Allagaat takullugu tupigusuummernarpoq, taamatullu ittumik misigisaqanngisaannarsimavunga. Nakkutilliisunit uumisaarinerungajapporluunniit, Justus Hansen oqarpoq.
- Inatsisilerituujunngilagummi
Nakkutilliisut kommunit inatsimmik malinninnersut nakkutigisussaavaat. Suliami matumani Nakkutilliisut kommunilu tamarmik immikkut eqqartuussissuserisumut naliliisitsisimapput, tamannalu tunngavigalugu kommunalbestyrelsi februaarip 18-iani aalajangiisimavoq, Justus Hansen oqaluttuarpoq:
- Suliaq isummerfigisussanngoratsigut kommunimi pisortatsinnit ilitsersorneqarsimavugut, inuilli inatsisitigut ilisimasallit paragraffinik assigiinngitsutigut paasissutissiisartillugit uagut politikkerit paatsiveerutsinneqassaagut, Justus Hansen oqarpoq.
Apeqqut: Inga Dora G. Markussenip oqaluuserisassanngortitami itigartitsissutigineqarsinnaanera pillugu kommunip eqqartuussissuserisumut naliliisitsisimaneranik isornartorsiuinera paasisinnaaviuk?
- Tamanna paasilluarsinnaavara, pisortaqarfiulli naliliisitsisarnera arlaleriarlunga misigisarsimavara. Tamanna tunngvimmigut pingaaruteqarpoq, inatsisilerituulli tamatumannga qanoq paasinnissimanerat apeqqutaavoq. Kommunalbestyrelsimimi ilaasortaasugut inatsisilerituujunngilagut, Justus Hansen oqarpoq.
Borgemsterip Charlotte Ludvigsenip kingullermik nalunaarutigaa, suliaq Nakkutilliisoqarfimmut nalilertinniarlugu. Sulialli Nakkutilliisoqarfimmi isummerfigineqassanersoq Naalakkersuisut aalajangertussaavaat.