Piniarneq
Justus: Tuttunniarnermut aqutsiveqarfik Kommunip tigussavaa
Tuttunniarnermi atungassarititaasut ajorsiartuinnarnerisa kingunerisaanik, Kommuneqarfik Sermersuup tuttunnniarnermut umimmanniarnermulli aqutsiveqarfiup Namminersorlutik Oqartussaniit tiguneqarnissaa, Demokraatineersup Justus Hansenip siunnersuutigaa.
Agguaassisarneq kommunimit tiguneqarnissaa pillugu kommuni Namminersorlutik Oqartussanut saaffiginnissuteqassasoq, Justus Hansenip kommunalbestyrelsi ataatsimeeqqilerpat siunnersuutiginiarpaa.
- Pinialuttartunut Namminersorlutik Oqartussat killilersuinerat paasisinnaanngilluinnarpara, isumaqanngilaq ilisimatuullu innersuussinerannut naleqqiullugu killormoorluni, Demokraatit kommunalbestyrelsimi ilaasortaatitaa oqarpoq.
Ukiuni kingullerni pingasuni atungassarititaasut malunnaatilimmik ajorseriarsimanerat, taassuma tunngavilersuutigai. Aavartarneq ulluni 76-niit ullunut 61-nut. Nuummilu nunat immikkoortuini marlunni pinialuttartut pisarisinnaasaat uumasunut tallimanut killilerneqarlutik.
- Tamatumunnga atatillugu maluginiartariaqarpoq, pinngortitaleriffiup innersuussutiginikuummagu pisassat amerlineqarsinnaasut kiisalu killilersuinerit pineqartut inuutissarsiutigalugu piniartunut atuutinngitsut, Justus Hansen oqarpoq.
Taanna isumaqarpoq ingerlatsiviup tiguneqarnissaanut inatsisitigut periarfissaqartoq, piniarnermulli inatsimmi paragraf 18 tikkuarlugu, Piniarnermut Naalakkersuisoq nunap ilaani sumiiffimmi killilikkami ingerlatsinermik tamarmiusumik imaluunniit ilaannakuusumik, sumiiffinnut ingerlatsiviusunut agguaassisinnaavoq.
- Piniarluttartunut killilersuineq Namminersorlutik Oqartussat eqqunnikuusaat pinialuttartunuinnaq akornusiinngilaq aammali peqassutsip annerulerneranik kinguneqassaaq taamaasillunilu aamma naasoqassuseq innarlerneqassaaq. Taama pisoqassappat ukiut qulikkaat arlallit qaangiuppata aatsaat naasoqassuseq iluarseqqissaaq kiisalu piffissami tassani tuttunik aavarneq aamma pisinnaasussaanngilaq, Justus Hansen naggasivoq.