Skip to main content

Justus Hansenip Tasiilami mittarfeqalernissaa piumasaraa

Tunumi angallannerup pitsaanerulernissaa pillugu Justus Hansen Demokraatineersoq ilungersortuarsinnarpoq

Kommuneqarfik Sermersuumi kommunalbestyrelsimi ilaasortap Justus Hansenip tunumi silaannakkut angallannerup pitsaanerulernissaa anguniartuarsinnarpaa.

- Assartuineq pillugu isumalioqatigiissitap siunersuutaa atuaratsigu Tasiilami nuannaarrappugut. Siunersuutigineqarpormi Tasiilami mittarfiliortoqassappat inuiaqatigiinnut aningaasatigut iluaqusiissasoq. Tasiilami najugaqartuulluni aamma oqaatigineqarsinnaavoq inuuniarneq mittarfeqalissappat oqinnerulissammat. Qaqagumita tamanna iliuuseqarfigineqassava? Tasiilaq mittarfittaarnissaminut maannakkut pisariaqartitsivoq, Justus Hansen oqallissaaraluni allappoq.

Iluaqutissat amerlasuut
- Tunumut angalasut amerlanerpaartaat Tasiilaliarlutik angalasarput. Assartuineq pillugu isumalioqatigiissitap nalilerpaa, mittarfik Kulusummit Tasiilamut nuunneqartuuppat ukiumut 1.640-nik angallassinernik amerlissasut. Tamanna assartuineq pillugu isumalioqatigiissitap naatsorsuutigaa akunnernik 273-inik naleqassasoq, qulimiguulimmilli angallanneq sivikillisaataajunnaassaaq. Ukiumut 6,8 million koruuninik iluanaaruteqartoqartassasoq siunersuummi ilaatigut eqqaaneqarpoq. Aammalu CO2-mik aniatitsineq annikinnerulissalluni, Justus Hansen oqarpoq. 

Mittarfik Tasiilamut nuunneqartuuppat Tasiilami takornariaqarneq annertunerulissasoq naliliivoq.

- Namminersorlutik ingerlataqartut Destination East Greenlandilu inuiaqatigiinnut pitsaasumik sunniuteqassagaluarput, naatsorsuutiniillu amerlanerusunik isertitaqartoqartassalluni. 

Politikkerit eqeertariaqartut
Innuttaasut eqqarsaatigineqartariaqartut Justus Hansen oqarpoq.

- Tasiilaq ineriartorpoq, tunumi nunaqarfinneersut Tasiilamut nuuttarput. Innuttaasut amerliartuinnartut pitsaasumik angallannissaat pisariaqartinneqassaaq. Taamaattumik Tasiilami mittarfeqalernissaa pisariaqarpoq. Ulluni amerlavallaartuni Kulusummi, Rekjavikkimi Nuummilu unnuisinneqartarpugut. Taama utaqqinitsinnut ilaqutatsinnut suliassatsinnullu piffissaq atugassaraluarput annaasarparput. Utaqqinerit kikkunnulluunniit iluaqutaanngillat. Politikkerivut eqeertariaqalerput, tunumilu pisariaqartinneqartut salliutinneqartalertariaqarlutik, Justus Hansen oqarpoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER