Timmisartuussineq
Justus Hansen: Tunumut Tunumiillu angalasut kingulliunneqartuarput
Air Greenlandip Tunumi suliaminik naammassinnissinnaanera, Inatsisartuni ilaasortap, Justus Hansenip (D), apeqquserpaa.
- Ukioq qaangiuppoq aammaarlunga ukioq naavara paasillugu Air Greenlandip Tunumi suliassani naammassisinnaanngikkaa, Justus Hansen tusagassiuutinut nalunaarummi allappoq.
Eqqumiitsumik taamaatitsinerit
Taanna isumaqarpoq, taamaatitsinerit eqqumiitsut amerlavallaarlutillu akulikippallaarlutillu, tamatumalu kingunerisarpaa Tunumut Tunumiillu angalasut piffissaq eqqorlugu tikiffissaminnut tikinngitsoortarnerat.
- Tamanna ajorluinnarpoq, Tunumummi Tunumiillu angalaniartut kingulliunneqartuarput, Justus Hansen nukillalaarluni oqarpoq.
Qanittumi angalasut 80-it Kulusumukartut illoqarfiit pingaarnersaanniit ingerlariaqqinneq ajulersimapput.
Atuaruk: Timmisartumik angalasut Nuummiik ingerlaqqinneq ajulertut
Qanigisat ilaginissaat
- Juulli aanaralaannguaq aamma juullisioqatigissavagut ilaquttagut asasagut. Amerlaqaagut qitornaqartut illoqarfeqartiginngisatsinnik ilinniarneq pissutigalugu imaluunniit allamik pissuteqarluni. Takunissaannut qilanaaqaagut aamma sapinngisamik sivisunerpaamik peqatiginissaannut, Justus Hansen erseqqissaavoq.
Tassanerpiarlu nukillalaaqqanera aallartippoq.
- Tunumut timmisartorniarluni kinguaattoornerit aamma kingulliunneqarnerit pissutaallutik ilaquttaminnut tikeraarniartut naatsorsuutigisaminnik sivikinnerusumik ilaquttatik najortariaqartarpaat. Tamanna amerlaqisugut nakeriallaatigisarparput. Tupinnanngilarli. Ukiumi qaangiutilersumi paaseqqiinnarparput Air Greenlandip kitaani timmarsartuussinissani salliutittuaraa, Justus Hansen isummerpoq.
- Kingulliunneqartuarneq pissutaasoq
Taassuma tikkuarpaa, silarlunnerup kingunerisaanik kinguaattoortoqarsinnaasoq. Timmisartunilu teknikkikkut ajornartorsiuteqartoqarsinnaasoq.
- Namminerli takusinnaavarput Tunumut timmisartuussinerni kinguaattoortarnernut pissutaasoq Tunup Kitaanut naleqqiullugu
kingulliunneqartarnera.
Taanna naapertorlugu, Air Greenlandip timmisartuutaasa timmisinnaannginnerisa nalaanni imaluunniit timmisartuussinerni illoqarfiit allat salliutinneqarnerini, Air Icelandip timmisartuutai Kulusummut mittartut takusarsimavaat.
Inatsisartuni ilaasortap Tasiilaminngaanneersup Tunumut angalanermini misigisani pillugit siornatigut nipituuliuutigisimavaa.
Aamma atuakkit:
Kangiata sineriaanit ikioqquneq
Justus Hansenip Tunumi sumiiffinni pingasuni timmisartuussisoqartalernissaa kissaatigaa