Kommunalbestyrelsi
Justus Hansen Demokraatini qaffariarpoq
Kommuneqarfik Sermersuumi Demokraatini partiitut nutaamik siulittaasortaarput, tassalu Justus Hansen. Partiip IA-mik suleqateqarnini ingerlatiinnassavaa
Kommuneqarfik Sermersuumi Ataqatigiit Demokraatillu kommunalbestyrelsimi suleqatigiilluartumik isumaqatigiissutaat allannguuteqarani ingerlaannassaaq.
Inuit Ataqatigiinnit Mille Søvndahl Pedersen tusagassiutinut nalunaaruteqarpoq.
Demokraatinit Anda Uldum Aningaasaqarnermut Aatsitassarsiornermullu Naalakkersuisutut Naalakkersuisunullu siulittaasutut tulliatut ivertinneqassaaq tallimanngornermi, taamaattumillu Kommuneqarfik Sermersuumi Kommunalbestyrelsimi sulinngiffeqarnissamik qinnuteqarpoq.
Poul Hansen politikkerinngoqqippoq
Tamanna pissutigalugu sinniisoq Poul Hansen kommunalbestyrelsimi ilaasortaalissaaq.
Taarseraattoqarnera pissutaalluni Justus Hansen Demokraatini kommunimi gruppimi siulittaasunngussaaq.
- Inuit Ataqatigiit ukiuni kingullerni suleqatiginerani angusat pitsaasut amerlaqaat, qinigaaffiullu sinnerani aamma tamanna attatiinnassavarput, kommunalbestyrelsimi ukiuni arfinilinni ilaasortaasoq Justus Hansen nalunaarummi oqarpoq.
Qinigaaffimmi kingullermi Inuit Ataqatigiit ilaatigut suleqatigisimasaat Poul Hansenip suleqatigileqqinnissaa qilanaaraat.
Justus Hansen Inatsisartuni aamma ilaasortaavoq. Inatsisartunut qinersinermi 109-nit qinerneqarpoq.