Julie Simonilu juullisiummik saqqummersitseqatigiittut

Julie Berthelsen Simon Lyngelu juullisiummik sanaqatigiipput, isertitallu Juullip Nipitittagaata aningaasaateqarfianut tunniunneqassallutik.

Privatfoto Grønlands Julemærkefond Privatfoto Grønlands Julemærkefond Privatfoto Grønlands Julemærkefond

Kalaallit nipilersortartut ilisarisimaneqarluartut marluk, Julie Berthelsen aamma Simon Lynge suleqatigiillutik erinarsuusiorsimapput atserlugu 'December Sky'.

Tamarmik Kalaallit Nunaanni Juullip Nipitittagaa aallartitaapput, ukioq mannalu juullip nipitittagaa Nuummi Københavnimilu Kalaallit Illuutaanni ataatsikkoortumik saqqummiunneqarmat, erinarsuusiartik nunarsuaq tamakkerlugu saqqummiuteqqaarpaat. Saqqummersitsinerup kingorna, ullut marluk qaangiummata, Københavnimi Christians Kirkemi tusarnaartitseqqipput.

- Misigisaq nuanneqaaq, erinarsuullu tigulluarneqarpoq, Frida Helen Winberg Waaben, Juullip Nipitittagaata Danmarkimi tapersersortaasa siulittaasuat oqarpoq.

Simon Julielu Christians Kirkemi

Erinaq tusarnerluinnartutut, erinarsortullu nipaasa tulluarluinnarnerat nersualaarneqarput. Taallaa tusarnaartunit aamma nuannarineqarluarpoq, juullisiutaannaanngilarmi.

- Erinnap sammisaq paquminarsinnaasoq, uninngatiinnarsinnaanngisarpulli sammisaraa. Inuunermi misigisat erloqinarsinnaasut – aamma juullilernerani kiserliorneq misigisassarisussaanngikkaluaq. Angalaneq, imminut qiviarsinnaaneq, inuuneq taarlunilu annernaraluarpalluunniit. Piffissami erloqinartumi ingerlagaluaraanniluunniit qaamaneq nassaarinneqarsinnaavoq, tusagassiutinut nalunaarummi Juullip Nipitittagaata Aningaasaateqarfia allappoq.

CD-p saqqaa, Simon Lyngep nulianit Janna Maritimit suliarineqarpoq

Juullip Nipitittagaa Aningaasaateqarfiata aallartitat taakku marluk siorna aperai juullisiummik erinarsuusioqatigiikkumanersut, nangaanatik ingerlaannaq akuersisimapput.

- Taakku oqaluttuarput suliaqaqatigiissallutik siornatigut oqaloqatigiittareersimallutik, marluullutilli suliassaqartuartuugamik pilersaarut suli piviusunngorsimanngitsoq. Taamaammat aperineqaramik nuannaaqaat, Frida Helen Winberg Waaben oqaluttuarpoq.

Simon Lyngelli assamminik ajoquserneratigut suliaq nalorninartorsiulersimagaluarpoq. Erinarsortartulli taakku marluk naapinnissaat septembarimi iluatsippoq.

- Piffissaq sivikitsuinnaq atorlugu taalliorlutillu immiusseqatigiipput.

Piffissarli sivikitsuinnaq atorlugu erinarsuusiortoqaraluartoq, suliaq kusanarluinnartumik naammassineqartoq, Frida Helen Winberg Waaben isumaqarpoq.

- Kalaallit Nunaanni nuannarineqarluartussatut piukkunnaalitittut isigaara.

Erinarsuut CD-tut saqqummereerpoq, erinarsortartut tamarmik immikkut erinnamik ataatsimik suli saqqummersimanngitsunik saniatigut ilassuteqartillugit. Simon Lyngep ilanngussaa ateqarpoq 'Indian Summer' Julie Berthelsenillu 'I love You, do you know?' erinarsorpaa.

Juullip Nipitittagaata Aningaasaateqarfiata CD juullerpalaartitsisoqarnerani tuniniartassavaa. CD Kalaallit Nunaannut nassiunneqarsimalerpoq, Juullip Nipitittagaata Aningaasaateqarfiani aamma tuniniarneqarsinnaassalluni.

Powered by Labrador CMS