Farvel

Julie Rademacher soraarpoq

Aleqa Hammondip tusagassiorfinnut atatillugu siunnersuisua atorfimminit tunuarpoq eqqissisimaniarluni

Julie Rademacherip Aleqa Hammond qimappaa: – Pissutsit taamaatsillugit atorfinniiginnarsinnaanngilanga. Assi ukioq manna apriilimit, Københavnimi tusagassiortunik nunanit tamalaaneersunik katersortitsinermi. Taamaasinerani Julie Aleqap inuttut siunnersortaatut atorfinitsinneqarsimavoq. Julie Rademacherip atorfinitsitaanermut isumaqatigiissummik suli atsiugaqarsimanngilaq.

Arktis Media

Poul Krarup

sapaat 15. sep 2013 09:53

– Suliaq allanngorsimavoq Aleqa Hammondimillu peqateqarnera allanngorsimavoq. Tamanna tunuliaqutaralugu tunuarniarlunga aalajangerpunga, Julie Rademacher oqarpoq, oqarlunilu tallimanngornermi septembarip 6-ianni taamatut aalajangersimalluni. Taamatut aalajangernerminut sunarpiaq pissutaanersoq oqaatigiumanngilaa.
– Qularnanngilaq atorfinitsitaanerma ingerlarnga tamatumunnga pissutaaqataasoq. Atorfinitsitsinermut isumaqatigiissummik atsiugassamik suli pisimanngilanga. Tamatuma ingerlarnga sakkortusimavoq isumaqarpungalu inuiaqatigiinnit avataaniittunit naammaginanngitsumik pineqarlungalu pasinarsarneqarsimasunga. Suliap ingerlarngata aamma suilnera ajornakusoornerulersissimavaa, tamannalu Aleqa Hammondip naalakkersuisoqarfianik ullluinnarni suleqatigiinnermut sunniuteqarsimavoq, taanna nassuerpoq.
– Aleqa Hammondimik peqateqarnera aamma allanngorsimavoq. Qineqqusaarnermi suleqatigiilluartorujussuusimavugut, Julie Rademacher oqaluttuarpoq, taannalu Siumup qinersinermi ajugaaneranut pisooqataalluinnarpoq.
Aamma atuaruk: Julie Rademacher akunnermut 443,75 koruunisisarpoq
Aamma atuaruk: Aleqa: Rademacherimut tunngasoq tamaanga killeqarpoq
Aamma atuaruk: Tusagassiorfinnut ataqatigiissaarisutut atorfimmut paatsuunganeq
– Tamatumali kingorna assigiinngitsunik pisoqartarsimavoq tamannalu pissutigalugu atorfinnit tunuarpunga, taanna oqarpoq itisiliinanilu.
– Maanna tunuarniarninnut pissutaaqataavoq uppernarsarneqarsimammat ajortuliorsimanngitsunga, pitsaasumillu tunngaveqarlunga tunuarsinnaallunga, Julie Rademacher tikkuaavoq.
Maanna sussavit?
– Ilisimatusarfimmi atualerpunga lektionillu siulliit ingerlarereerpakka. Sociologi-mi aamma pisortat aningaasaqarneranni kandidat-itut ilinniagaqarnera naammassiniassavara. Ukiunik marlussunnik sivisussuseqassaaq. Uannut apeqqutaanngilluinnarsimavoq Kalaallit Nunaanniiginnassanersunga. Maani inuuneq, kulturi, pinngortitaq minnerunngitsumillu inuiaqatigiinni pissanganartorujussuarmik ineriartortuni peqataanissaq nuannareqaakka.
– Maanna ilaquttakka tusagassiortullu avataanni inuuneq eqqissisimanarnerusoq samminerulissavakka inuiaqatigiilerinermilu kandidatitut ilinniagaqarnera naammassiniarlugu, Julie Rademacher, aappaqartoq marlunnillu ukiulimmik qitornaqartoq, oqarpoq.