Julie nipilersornikkut nalliuttorsiortitsinermi angalasoq
Atlantikup avannaani nalliuttorsiornerit pingasut, pingasunngornermi unnukkut Odense Koncerhusimi nuannersumik tusarnaartitsisoqarneratigut nalliuttorsiutigineqarput.
Julie Berthelsen solistiullunilu aliikkusersuisunut akunniliisuuvoq. Odense Symfoniorkester Henrik Vagn Christensen nipilersortuni ussersuataartoralugu tusarnaartitsipput aamma erinarsoqatigiit Filharmonisk Kor tusarnaartitsipput.
Namminersornerup eqqunneqarneranit ukiut qulinngornerat. Savalimmiormiut erfalasuata ukiunik 100-nik nalliuttorsiutigineqarnera. Aamma Islandip pisortatigoortumik Danmarkimit namminersortunngorluni avissaarneranit ukiut 75-inngornerat. Odense Symfoniorkesterip aamma Nordatlantisk Husip suleqatigiillutik nalliuttorsiorluni tusarnaartitsinermut aaqqissuussinerannut taakku pissutaapput.
Atlantikup avannaani nipilersornikkut angalaneq
Odense Symfoniorkesterip, Filharmonisk Korip aamma Julie Berthelsenip tusarnaartut Atlantikup avannaani nipilersornikkut angalaartippaat, qallunaat, savalimmiormiut, islandimiut aamma kalaallit nipilersugaannik tusarnaartitsillutik. Nipilersukkat pisoqqat. Nipilersukkat nutaaliat. Julie Berthelsen aliikkusersuisunut akunniliisuunermi saniatigut nipilersukkaminik pingasunik atuivoq. Ukunannga nipilersukkat atorneqarput: Niels W. Gade, Sunleif Rasmussen, Petur Alberg, Carl Nielsen, Jonathan Petersen, Sveinbjörn Sveinbjörnsson, Jón Leifs, Hans Ernst Krøyer aamma Julie Berthelsen. Savalimmiormioq erinniortoq Sunleif Rasmussen Odense Koncerhusimiippoq, ilisaritinneqaramilu ersaattaanneqarpoq.
Odense Koncerthusimi Carl Nielsen Salenimi tusarnaartorpassuit nikuillutik Savalimmiut, Islandip, Kalaallit Nunaata aamma Danmarkip inuiattut erinarsuutaat erinarsorpaat.
Tusarnaartitsisarfiup paarlersuani nunat Atlantikup avannaaniittut pingasut pillugit paasissutissanik nerrivilersuisoqarsimavoq. Nerriviit tusarnaarianit ornigarluarneqarput. Kalaallip Ivalo Kanuthsenip Nordatlantisk Hus pillugu oqaluttuarpoq.
Every little part of me
Julie Berthelsenip ukiut 17-it matuma siorna saqqummersitani nuannarineqarluartoq ” Every little part of me” soorunami erinarsorpaa. Taassuma erinaa Odense Symfoniorkesterimut tulluarpoq. Nipilersoqatigiissuit aamma erinarsortartup suleqatigiinnerat misigisaq annertullunilu illuatungeriinnut pitsaasuusoq takuneqarsinnaallunilu tusaaneqarsinnaavoq. Julie Berthelsen scenemit ima oqarpoq:
- Nipilersoqatigiit uku erinarsortuuffigalugit nuannerluinnarpoq.
Der er et yndigt land
Danmarkip inuiattut erinarsuutaanik tusarnaartitsineq naggaserluarneqarpoq.