Julie "eskimo" pillugu: Siku pineqanngilaq
Erinarsortartup Julie Berthelsenip paasisinnaalluarpaa, oqaatsip inuit, eskimomut taarsiullugu atorneqarusunnerunera. Taamaammat Danmarkimi sikuliortartup siku Eskimo allatut taaguuteqartinniarlugu aalajangersimanera nuannaarutigivaa.
Erinarsortartutut ilisimaneqarluartoq Julie Berthelsen oqaaseq ”eskimo” pillugu oqallittunut akuliuppoq. Sikuliortarfiit arlallit tunisassiaminnik eskimomik taaguutilimmik, narrujuummisoqartarsimanera pissutigalugu allatut taaguusersuilermata oqallittoqalerpoq.
Erinarsortartoq Facebookikkut allappoq, oqaaseq eskiko atorneqaraangat nammineq inuttut ajuallaatigineq ajorlugu:
- Oqaaseqarpoq ajornerujussuarnik kalaallinut tunngatinneqartartunik. Ajuallattoqartarneranut nukikka atornianngilakka. Naqqiissuteqarfigilaaginnarpara, taamalu nukikka tassunga atorlugit.
- Paasisinnaalluarparali oqaatsip Inuit atorneqarusunnerunera, Julie Berthelsen allappoq.
Inuit 1977-imi akuerisaasoq
Taassuma innersuussutigivaa, taaguummut eskimomut taarsiullugu inuit atorneqartarnissaanik kissaateqarsimaneq Issittumi nunat inoqqaavinit pisimasoq.
Oqaaseq eskimo qangarnisaavoq, isumaqartinneqartarlunilu inuit neqimik ooqanngitsutortartut. Aamma "nunami allamiutut oqaasilittut" isumaqartinneqarsinnaavoq.
Taaguut inuit 1977-imi Inuit Circumpolar Conferencemit akuerineqarpoq, isumaqartinneqarluni Alaskami, Canadami Kalaallillu Nunaannit innuttaasut. Taamanerniilli oqaaseq inuit atorneqalerpoq.
- Siku pineqanngilaq
- Kalaallit Nunaannut Issittumilu tamarmi inunnut oqaaseq pisoqalisimasutut isigineqarpoq, taamaammallu nikassaanerullunilu kukkusuuvoq, Julie Berthelsen allappoq.
Danmarkimi sikuliortarfiup HansensFødeisip sikuutimi ilaasa taaguaataanik allannguiniarluni, Eskimomillu taaguuteqarunnaartinniarlugu aalajangersimanera nuannaarutigaa.
- Qamuuna ilukkut nuannaajallappunga. Oqallinnermimi matumani "SIKU" tunngaviatigut pineqanngilaq - oqaaseq oqaatsillu tunngavia pineqarput - AAMMA taaguummik allamik inuit kissaateqarnerat pineqarluni. Tassa nassuiaatissartaa, allanut paasiuminaalaarsinnaagaluartoq, Julie Berthelsen allappoq.