Julie Edel Hardenbergip eqqumiitsuliaa New Yorkimi saqqummersinneqartoq
"Trophy - Pearls", Danmarkip oqaluttuarisaaneranik sulilu Kalaallit Nunaanni najuunneranik erseqqissaassuteqartoq, Danmarkip New Yorkimi konsuleqarfiani takuniarneqarsinnaanngorpoq.
Julie Edel Hardenberg eqqumiitsuliorneq aqqutigalugu nunasiaataasimanermit kingornussanik pissaaneqarnikkullu pissutsinik Kalaallit Nunaata Danmarkillu akornanni atuuttunik ukiorpassuarni misissuisimavoq.
Eqqumiitsuliat nunarsuarmi nunani tamalaani saqqummersinneqartarsimapput, maannalu eqqumiitsuliaa ”Trophy – Pearls” Danmarkip New Yorkimi generalkonsulatiani misigineqarsinnaanngorpoq.
Tamanna pivoq nalitsinni eqqumiitsuliortut siuttuusut 15-it eqqumiitsuliaannik 30-nik ataavartumik saqqummersitsinermi, tamatumanilu Julie Edel Hardenberg eqqumiitsuliamik ataatsimik saqqummersitsilluni peqataavoq, taannalu Danmarkip oqaluttuarisaanermi sulilu Kalaallit Nunaanni najuunneranik erseqqissaassuteqarpoq, Art at the Residence tusagassiuutitigut nalunaarummi paasissutissiivoq.
- Eqqumiitsuliara "Trophy - Pearls", Ny Carlsbergfondenip Danmarkip New Yorkip Generalkonsulatiata Najugaqarfiani pinnersaataanut ’Art at the Residence’-mut maanna ilaalersoq, nunasiaataajunnaariartuaarnermik sammisamut taperseeqataavoq. Tamanna nunasiaataanikkut kingornussatsinnut atatillugu sammisami nipinut isorinnippaluttunut inissaqartitsinissamik anguniagaqarninnik uannut inuttut nersorinnissutaavoq, Julie Edel Hardenberg nassuiaavoq.
Nammineq misilittakkaminik atuisartoq
Ujammit, Julie Edel Hardenbergip eqqumiitsuliaanut ilaasut, ilaqutaanit Helene Joensenimit, umiarsuarmi Kalaallit Nunaata sineriaani 1900-kkut qiteqqunneranni angalatinneqarluni sakialluummik misissuinermut atorneqartumi oqalutsitut sulisimasumit, pigineqarsimapput. Joensen angalanermini umiarsuup tikittagaani kusanartulianik pisisarsimavoq.
Julie Edel Hardenberg kalaallimik anaanaqarpoq qallunaamillu ataataqarluni, eqqumiitsuliaanilu nunasiaataanermit kingornussat pissaaneqarnikkullu pissutsit Kalaallit Nunaata Danmarkillu akornanni atuuttut sammineqarajuttarput.
Eqqumiitsuliortup aaqqissuussaanikkut suleriaatsit imminut kalaaliusutut isiginnittaatsimut qanoq sunniuteqartarnerat nammineerluni misigisimavai. Ilaatigut Hardenbergip eqqumiitsuliaminik oqaluttuarinninnermini skizofrenimik nappaateqartutut misigisimaneq arlalinnik kultureqartutut tunuliaqutaqarnermit pisuusoq nunamilu Danmarkimi inuiaqatigiinnik tunngaveqarluni piorsarneqarsimasumi nunaqarnerup inuit qanoq sunnertarnerai erseqqussaatigai.
Julie Edel Hardenberg Sermitsiaq.AG-mut paasissutissiivoq, 2022 ulapaarfiusimasoq eqqumiitsulianik illoqarfinni assigiinngitsuni 14-ini saqqummersitsisimalluni kiisalu Artist Talksinik aqqanilinnik ingerlataqarsimalluni.
Eqqumiitsuliaminik katillugit nunani assigiinngitsuni 21-ni illoqarfinni assigiinngitsuni 91-ini saqqummersitsisimavoq.
- Ukiut aggersut eqqumiitsuliortutut ilisimatusarninni ”Pissaanerup soriarsinnaassuseqannginnerullu akornanni – eqqarsartaatsip nunasiaataajunnaarsinneqarsimasup/nunasiaataasup”-mik qulequtaqartumi suleriaatsimik tunngaveqartumi itisiliinerunissamut atorneqassapput, tamatumanilu Bergenimi Kunstakademimi piffissap ilaani atorfeqarnerma saniatigut ulluinnarni Kongelige Danske Kunstakademimut aamma Københavns Universitetimut attuumassuteqarlunga, Julie Edel Hardenberg paasissutissiivoq.