Julie Berthelsen Eurovisionimi ilaassaaq

Julie Berthelsen Nina Kreutzmannilu dansk melodi grand priximi ajugaanngikkaluartut, taamatullu Eurovisionimi unammeqataalinngikkaluartut, taamaattoq Eurovision unnugu aallartippat Julie Berthelsen peqataassaaq.

Eurovision Tel Avivimi ullumimiit arfininngorpat maajip 18-ata tungaanut aallakaatinneqalerpat, erinarsortartoq nuannarineqarluartoq Julie Berthelsen isiginnaartunit takuneqarsinnaassagunarpoq.

Danmark sinnerlugu ukioq manna kikkut naliliisartuussanersut DR-ip sapaatip akunnerata siuliani saqqummiuppai, Julie Berthelsenilu naliliisartunut ilaavoq.

Tel Avivimi Eurovision Song Contest ingerlanneqarpat isiginnaartut aalajangeeqataasinnaassapput, naliliinerup tamakkiisumik aaffaattut naleqartumik aalajangiisinnaatitaassallutik, aammali naliliisartut aalajangeeqataasassallutik.

Dansk Melodi Grand Prix

Julie Berthelsen aamma Nina Kreutzmann Danmarkimi Melodi Grand Priximi erinarsuut ’League of Lights’ atorlugu peqataapput, isiginnaartuniillu taajuunneqarnerpaallutik. Naliliisartulli Leonora ajugaatippaat, taamaasillutik Julie aamma Nina Eurovisionimi peqataanngitsoortillugit.

Finalimut anngunniunneq siulleq ullumi maajip 14-ani ingerlanneqassaaq, tassanili Julie, qallunaat naliliisartui sinneri peqatigalugit eqqissisimaaginnarsinnaavoq, Danmarkimi toqqaaqataasinnaassanngimmat.

Naliliisartulli sisamanngorpat sunneeqataasinnaalissapput. Danmarkimi sinnerlugu Leonora erinarsuut ‘Love is Forever’ atorlugu unammeqataassaaq.

DR-ip Eurovision Song Contestimut finalimut anngunnniunnerit marlunngornermi maajip 14-ani sisamanngornermilu maajip 16-ani aallakaatissavai, taamatullu ajugaaniutivinneq arfininngorpat maajip 18-ani aallakaatissallugu.

Powered by Labrador CMS