Julie aamma Nina: Timersortartuuvugut
Julie Berthelsen aamma Nina Kreutzmann Jørgensen danskit Melodi Grand Prixianni ajugaasup tulliattut inissipput. Taakku neriupput kalaallit erinarsortartut allat periarfissaqarnerulissasut.
- Marluulluta timersortartuuvugut, soorunami peqataavugut ajugaaniarluta. Taamaammat uggornarpoq ajugaasup tulliattut inissikkatta, Julie Berthelsen, Leonorap erinarsugaa “Love is forever” ajugaasoq paasinarsereermat apersorneqarnermini nassuiaavoq – Kalaallit Nunaat tamavimmi neriussimagaluarpoq Julie aamma Nina ajugaassasut.
- Nuannertorujussuuvoq peqataalluni. Nalinginnaasumit erinarsuut tigulluarneqarnerujussuuvoq, Nina Kreutzmann Jørgensen, meeqqaminit isiginnaariarneqarsimasoq oqarpoq.
Nuannerluinnartoq
- Nuannerluinnarpoq – Kalaallit Nunaanniillu tapersersorneqarluarnerput aamma nuannerpoq, Julie oqarpoq, taanna neriuuteqarpoq ukioq manna Grand Priximi peqataanerup kinguneranik kalaallit erinarsortartut periarfissagissaarnerulissasut.
- Erinarsortartunik tamatigoortunik pikkorilluinnartunillu peqarpugut, tullissaani aamma maluginiarneqarnissarput qularnanngilaq.
Imaqanngitsutut misigineq
- Massakkut imaqanngitsutut misigivunga. Ajugaassalluta aalajangeqqasimavugut – kisianni massakkut naavoq. Ulapingaatsiarnikuuvugut – massakkut qasuersaarsinnaavugut. Nillaarimmik immiaarartornissannut qilanaarpunga, Julie oqarpoq.
Apersortitsinissaq qilanaarineqarpoq
Ninap gin og tonicitornissani qilanaaraa – aammali panimmi apersortinnissaa qilanaaralugu. Melodi Grand Priximi ajugaasimagaluarunik, taamatullu Jerusalemimut maajip 16-aniit 18-anut tusarnaartitsiartortariaqalersimagaluarunik, apersortitsinermut peqataasimasinnaassanngikkaluarpoq.