Julie aamma Nina Melodi Grand Priximi appinnissaminnut piareertut
Piareersarluarsimavugut, qanoq angusaqarumaarnerput apeqqutaatinnagu Kalaallit Nunaanniit tapersersorneqarnerput qujamasuutigalugulu attortissutigaarput, Grand Priximi appinngitsiarnermi Julie aamma Nina oqarput.
- Piareersimalluarpugut, Julie Berthelsen aamma Nina Kreutzmann Jørgensen, Danmarkimi Melodi Grand Priximi arfininngornermi appinnissaminnut sungiusarluarsimasut oqarput. Taakku atussavaat League of Light - tuluttut taallartaqartoq, erinarsornerminnili aamma kalaallisut erinarsussapput.
- Pitsaanerpaaginnarmik saqqummerusuttarnerput unammillernarnerpaassagunarpoq. Marluulluta pitsaanerpaajorusuttuuvugut anguniagassaqarniartarlutalu qaffasissumik, Nina Kreutzmann Jørgensen oqarpoq. Herningimi Jyske Bank Boxenimi tallimanngornermi sungiusarneranni, Sermitsiaq.AG-p oqaloqatigai.
Kingullermik Kalaallit Nunaat Danmarkimi Melodi Grand Priximi peqataammat ukiut 40-t qaangiussimalerput. Rasmus Lyberth peqataanermini Ataatap Qinnutaa atorpaa, unammisunilu aqqanilissaattut inissilluni, Tommy Seebach Disco Tangomik erinarsortoq ajugaasoq.
Piffissaq pitsaalluinnartoq
- Asuliinnaanngilaq Kalaallit Nunaat erinarsorluni unammersuarnermi maanna peqataaqqilermat, Nina Kreutzmann Jørgensen isumaqarpoq.
- Piffissanngorpoq. Naalagaaffeqatigiinneq meeqqat atuarfianni atuartitsissutaalerpoq, silaannaap kissakkiartornera sermersuullu aakkiartornera kikkut tamarmik oqaluuseraat, minnerunngitsumillu Kalaallit Nunaat Europamut nunarsuullu sinneranut qaninnerulernikuuvoq, Nina Kreutzmann Jørgensen nassuiaavoq.
- Erinarsugarput ataqatigiinnermut tunngavoq. Immitsinnut ilisimasaqarfiginerusariaqarpugut immitsinnullu tikkuartorpallaarata. Naalagaaffeqatigiinneq oqaluttuassartaqarpoq immikkuullarissumik, nunarsuup sinnerata ilisimasariaqagaanik, Julie Berthelsen oqarpoq.
Tapersersorneqarnertik attortissutigaat
Melodi Grand Priximi erinarsoqataasussat peqataanissaat saqqummiunneqarmalli, kalaallinit tapersersorneqangaatsiarnertik malugisimavaat.
- Kalaallit Nunaanneersunit tapersersorneqarluta Facebookimi likerneqangaatsiarnerput oqaaseqarfigineqarnerpullu qujamasuutigisorujussuuarput. Qamannga pisumit qujarusuppugut – arfininngornermi unnukkut qanorluunniit angusaqaraluarutta. Tapersersorneqarnerput qullipinnanngitsuunngilaq. Tamanut qujanaq, Julie aamma Nina oqarput.
Julie aamma Nina sapaatip akunnerani qaangiuttumi ulapingaatsiarsimapput. Sapaatip akunnerata ingerlanerani tusarnaartitsinissaminnut sungiusarsimapput, nutsat inissinnissaannut pinnersarneqarnissaminnullu misiliinissamut aamma piffissaqarsimallutik. Danskillu radiokkut aallakaatitsiviini aamma pulaartarsimapput.
League of Light soqutigineqarluarpoq
- Tamanit assut tigulluarneqarpugut, immikkoortortanilu radiomi tusagassiortut erinarsuutitsinnut oqaluttuassatsinnullu soqutiginnittorujussuupput. Taamaammat arfininngornermi unammersuarnissamut isumalluarpugut, Julie aamma Nina oqarput.
Unamminerup inerneriumaagassaanik eqqoriaasartut upperissagaanni, Julie aamma Nina ajugaanissaminnut periarfissaqarput:
- Leonora ajugaasinnaavoq, Julieli tusaamasaavoq. Misiliilluni taasisitsinerni tamani ajugaavoq, naatsorsuutigineqarsinnaallunilu aamma kalaallinit taaneqangaatsiassasoq, Julie aamma Nina ajugaassasut upperaara, tipperen.dk-mi aningaasanoornermut immikkut ilisimasalik, Claus Dejligbjerg oqarpoq.
Melodi Grand Prixip ingerlanneqarnerani Julie aamma Nina Juliep anaanaanit Ninallu angajoqqaavinit tapersersorneqassapput, taakkumi isiginnaartut akornaniissagamik. Ninap meerai marluk aamma Kalaallit Nunaanniit tikissimapput, Herningimilu Grand Prixertoqarnerata nalaanni anaanartik isiginnaassallugu.