Nunafonden

Juliane: Taamaattumik Nunafondenip aningaasartuutai qaffapput

- Nunafondenimi maanna siulersuisuusut nalilerumaarpaat siulersuisut akissarsiaat qaffasippallaarnersut, Nunafondenimi siulersuisuni siulittaasuusimasoq Juliane Henningsen Inui Ataqatigiinneersoq oqarpoq

Juliane Henningsenip Nunafondenimi aningaasartuutit nassuiarpai

Nunafondenimi ingerlatsinermut aningaasartuutit 2009ip kingorna qaffarujussuarput siulersuisuusimasut aalajangermata aningaasaateqarfik ullutsinnut naleqqunnerusunngortinneqassasoq. Tamatumali malitsigisaanik siulersuisut suliassaat amerlisimaspput.

Ullutsinnut naleqquttoq
Taama nassuiaateqarpoq siornatigut Nunafondenimi siulersuisuni siulittaasoq Juliane Henningsen Inuit Ataqatigiinneersoq Nunafondenimi ingerlatsinermut aningaasartuutit qaffassimanerat pillugu. Ingerlatsinermut aningaasartuutit 2009p kingorna qaffakkiartulersimapput siornalu 2,7 millioner koruuniullutik.

Siulersuisut akissarsiaat aamma qaffassimapput 2009-mi katillutik 147.000 koruuniusinnarlutik maanna ukiumut 300.000 koruuninik amerlassuseqalersimallutik.

- Siulersuisuusimasut aalajangersimavugut aningaasaateqarfik ullutsinnut naleqqunnerusunngortinniarlugu. Nutaamik nittartagartaarpugut saqqumilaarnerulerlutalu. Taassuma malitsigisaanik saaffiginnittartut amerleriarujussuarput ukiumut saaffiginnissutit 600-ut missaanniilersimallutik, Juliane Henningsen Sermitsiaq.AG-mut oqarpoq.

Nunafondenimi aningaasartuutit qaffasissut ilagaat siulersuisut maanna ukiumut 300.000 koruuninik amerlassuseqartut.

Taamanitut akissaatit ipput
- Nunafondenimi ukiumoortumik naatsorsuutit 2009 sioqqullugu suliaasut qimerlooraanni takuneqarsinnaavoq taamanikkut siulesuisut akissaataat ullummikkut qaffasissusaasa amerlaqatigipajaarpaat. Siulersuisut uagut sioqqulluta atuuttut aalajangersimapput siulersuisut akissarsiaat apparneqassasut nunarsuarmi aningaasarsiornikkut ajornartorsiorneq pissutigalugu. Taamaattumik siulersuisut akissaataat 147.000 koruuninik amerlassuseqalersimagaluarput, Juliane Henningsen nassuiaavoq.

2007-mi ukiumoortumik naatsorsuutini takuneqarsinnaavoq siulersuisut akissarsiaannut aningaasartuutit 267.000 koruuniusut.

- Nunafondenip ullutsinnut naleqqunnerusunngortinnerata kingorna siulersuisut suliaat annertuseriarsimapput. Siulittaasup tulliata akissarsiai aamma qaffassimapput ullut tamakkiapajaarlugit aningaasaateqarfimmut tunngasunik taanna suliaqartarmat tassami allaffimmi aqutsisoq peqatigalugu taannaavoq akiliutigineqartunik akuersisartoq, Juliane Henningsen oqarpoq

Maanna Atassutip piumasaraa siulersuisut akissaataat appartinneqartariaqartut, siulersuisut akissaataat naammareermata.

- Ullumikkut siulersuisuusut isummerfigisariaqarpaat akissaatit annertussusaat naapertuuttuunersoq. Uanga oqaatigiinnarsinnaavara siulersuisut akissaataat aningaasarsiornikkut ajornartorsiorneq sioqqullugu annertussusaannut inisseqqinneqarsimasut, Juliane Henningsen oqarpoq.

Powered by Labrador CMS