IA-mi siulittaasoq nutaaq
Juliane: Siulittaasussarsiornermut sassarnianngilanga
Inuit Ataqatigiit majip 20-ani siulittaasussarsiornissaannut sassalersaarsinnaasut marluinnanngorput
Inuit Ataqatigiinni aaqqissuussaanikkut siulittaasup tullia Inatsisartunilu ilaasortaq Juliane Henningsen partiimini siulittaasutut qinigassanngortinnianngilaq. Inuiaqatigiilerinermi Ilisimatusarfimmi ilinniagaqarnini naammasseqqaarniarpaa aammalu misilittagartusareeruni Inuit Ataqatigiinni siulittaasumut sassaratarsinnaanini periarfissaatippaa.
Atuaruk: Kuupik Kleist siulittaasutut tunuarpoq
Atuaruk: Kuupik: Taamaammat siulittaasutut tunuarpunga
Inuit Ataqatigiit siulersuisuunerini ilaasortat pingasut partiimi siulittaasussarsiornissamut sassalersaarsinnaallutik nalunaarput Kuupik Kleist siulittaasutut tunuarnerminik martsip 31-at nalunaaruteqarmat. Tassaapput Juliane Henningsen, Aqqaluaq B. Egede aamma Sara Olsvig.
Immaqa siunissami
Juliane Henningsen maanna nalunaarpoq siulittaasumut sassarniarani.
- Aalajangerninnut pissutaavoq sulinerma saniatigut inuiaqatigiilerineq pillugu ilinniarnera naammasserusukkakku piareersimasutullu misigisimananga, Juliane Henningsen ukiup aappassaa Ilisimatusarfimmi ilinniartuusoq nalunaarpoq.
Taamaattoq siunissami Inuit Ataqatigiinni siulittaasussatut sassaratarsinnaannissani periarfissatut suli isigaa.
- Siunissami siulittaasussatut sassarnissannut piukkunnarsarnera ingerlanniarlugu aalajangerpunga, Juliane Henningsen naggasiivoq.