Politikki

Juliane: Piffissaq pitsaanerusoq inatsisiliornermut atorneqartariaqarpoq

- Meeqqat pitsaanerusumik atugaqartariaqarput. Taamaattumik meeqqanut inuusuttunullu inatsisissamut siunnersuut kinguartipparput, siunersuut ukiaanerani ataatsimiinnissamut kinguartinneqarnera IA-mi politikkerip nassuiarpaa

Inuit Ataqatigiinnit Juliane Henningsen

- Inatsisissamut siunnersuutip anguniagai pitsaasuusut malunnarpoq, taamaattorli kommuninut sullissisuinullu piumasaqaatit annertusineri piviusorsiortuunngitsut, taamaammallu kommunit inatsit ukiorpassuarni malikkuminaatsissimagaat.

Inuit Ataqatigiinnit Inatsisartunut ilaasortap Juliane Henningsenip inatsissatut siunersuutip kinguartinneqarnera nassuiarpaa.

- Taamaattumik Inuit Ataqatigiit Ilaqutariinnermut Ataatsimiititaliamut ataatsimoortumut inassutigisimavaat inatsisissamut siunnersuutip inuiaqatigiinnut minnerunngitsumillu meeqqanut illersorneqarsinnaasumik inaarneqassappat suliarineqarnissaa ima annertutigissasoq inatsisip inaarnissaanut sapaatit akunneri arlallit sinnertariaqarlutik, IA-mi politikkeri oqarpoq.

Kalaallit Nunaanni meeqqat tamarmik isumagineqarnissaat qulakkeertariaqartoq isumaqarpoq.

Meeqqat pisinnaatitaaffii
Meeqqanik inuusuttunillu sullissinerit tamarmik FN-ip Meeqqanut Aalajangersagaanik malinnittuunissaat Inuit Ataqatigiinniit qulakkeerneqartariaqartoq isumaqarfigaarput.

- Meeqqat inuusuttullu sumiginnakkat atukkamikkullu uloriarnartorsiortut pisortatigut ikiorneqartarnerat aaqqissuussisarnerillu nukittorsarneqassasut Inuit Ataqatigiit isumaqarput. Aningaasaliinertigut aammali kommunini sullissisut pikkorissartittuarnerisigut piginnaasatigullu qaffassaavigiuarnerisigut, Juliane Henningsen oqarpoq.

Sullissineq pitsaanerusariaqartoq
- Tamatuma saniatigut Inuit Ataqatigiinniit sullissisut qassinik sullitaqarsinnaanerinut tunngasunik ataatsimiititaliaq misissueqqusimavarput, tassami sullissinerup pitsaasusaa qulakkiissagutsigu sullissat amerlanerpaaffissalertariaqarpagut, aamma sullissisut stressilinnginnissaat sulinerminnilu atugarissaarnissaat pillugu, oqarpoq.

Kommunit tusarniaanerni akinissamut periarfissilluarniarlugit inatsisissatut siunersuutip kinguartinneqarneranut pissutaasut ilagaat.

- Sooq tusarniaanermi akissutinut kommunit naammattumik piffissalerneqarsimanngillat, tassami juullimi sulinngiffeqarnerup nalaani tusarniaasitsisoqarnera isornarluinnarpoq. Eqqumiiginanngilarlu inatsimmut siunnersuut kommuniniit naammattumik oqaase-qarseqarfigineqarsimanngimmat, uffa massa akisussaaffimmik annertunerusumik aningaasartuutinillu annertunerusunik kinguneqartussaasoq, Juliane Henningsen oqarpoq.

Powered by Labrador CMS