Juliane Henningsen kommunimi pisortaaninngortoq

Qeqqata Kommuniani kommunalebestyrelse ataasinngornermi ataatsimiinnermini aalajangerpoq, Juliane Henningsen kommunimi
pisortaanertut 2019-imi novemberip ulluisa 15-aniit atuutilersumik
atorfinitsissallugu, pisortaanertut soraartoq Paneeraq Olsen taarserlugu.

Qeqqata Kommuniani pisortaaninngortup kommunimi inuussutissarsiornikkut pissutsit kiisalu Kangerlussuup mittarfiata siunissaa eqqarsaatigalugit unammillernarsinnaasut aamma Kangerlussuup Sisimillu akornanni aqqusinermut suliniummi unammillernarsinaasut suuneri ilisimasaqarfigilluarpai.

- Nuannaaqaanga aamma maniguuuppunga paasitinneqarama atorfimmut innersuussutigineqarama. Sulilernissannut assorsuaq erinisoqaanga, soqutigilluinnarparalu inuiaqatigiinnik atuilluartunik pilersitseqataanissamut. Qeqqata Kommuniani kommunalbestyrelse inuussutissarsiornermik ineriartortitsinermik annertuunik anguniagaqartuupput aamma inuttaasut atugarissaartuunissaannik.
Kommunalbestyrelsep sullinnissaanut erinisuppunga aamma kommunimi sulisut tamaasa suleqatigilernissaannut. Suliffeqarfik annertuujuvoq suleqatigiinnissarlu iluatsitsissagutta pisariaqarluinnarpoq, Juliane Henningsen kommunalbestyrelsep pisortaanermik atorfinitsitsinissaminut aalajangerluni ataasinngornermi ataatsimiinnerata kinguninngua oqarpoq.

Juliane Henningsen Arctic Circle Businessimi pisortaanertut inuussutissarsiortunik ineriartortitsisimavoq. Taamatuttaaq Greenland Business qanimut suleqatigalugu Qeqqata Kommuniani nunap immikkoortuani inuussutissarsiornermik takornariaqarnermillu ineriartortitsiissaq siunertaralugu kiffaartuussinissamik isumaqatigiissuteqarlutik. Inuussutissarsiornermik ineriartortitsinissamut ingerlatsiviup Arctic Circle Businessip ilaatigut Qeqqata Kommuniani takornariartitsinissamut periusissiaq suliarisimavaa.

Politikkimiit qaffasissumik atorfimmut

Juliane Henningsen 35-nik ukiulik pingasunik qitornaqartoq aappanilu Sisimiuni, 2017-imili Arctic Circle Businessimi pisortatut najugaqarfigisimasamini najugaqarput.

Kalaallit Nunaanni politikkerit nuimanerit ilagisimavaagt, soorlu 2005-imi Inatsisartunut qinigaasimalluni, aamma 22-nik ukioqarluni Folketingimut Inuiat Ataqatigiit sinnerlugit 2007-imi qinigaasimalluni. Aamma partiimi politikkikkut aaqqissuussaanermilu siulittaasup tulliatut inissisimanikuulluni.

Juliane Henningsen Ilisimatusarfimmi inuiaqatigiilerinermik ilinniagaqarpoq, tassani sinerissap qanittuani aalisarnermi, tassungalu atatillugu Kalaallit Nunaanni akunnattoorfiusartut eqqarsaatigalugit qaleralinnik MSC-mik meqqilersuineq bachelorinngussutigisimallugu. Tamatuma saniatigut Aarhus Erhvervsakademimi “aqqutsinermik” pikkorissarsimalluni kiisalu 2018-imi Pre-MBA naammassisimallugu.

2015-imi Halibut Greenlandimi atorfinikkami Inatsisartuni ilaasortatut tunuarpoq, Halibut Greenlandillu aaqqissuussaanera eqqarsaatigalugu periusissiornermik ineriartortitsisarneq misilittagaqarfigilerlugulu aaqqissuussamik atuutsitsilerpoq. Siorna Great Greenlandimi siulittaasutut aamma toqqagaavoq.

Juliane HenningsenCV-mini imminut ima ilisaritippoq, Inatsisartuni Folketingimilu politikkeritut kiisalu Halibut Greenland ApS-imi aamma maanna rcrtic Circle Businessimi sulininni tamatigoortumik angusaqarluarlunilu suliaqartartoq.

- Kisimaanngitsoq, kisianni inuppassuarnik tupinnaannartunik peqateqarlunga.

Attaveqaasersuinissat

Qeqqata Kommuniani kommunalbestyrelse kiisalu umiarsualiveqarnermut siunnersuisooqatigiit, najukkami inuussutissarsiortunit suliniaqatigiiffinnillu inuttaqartut Sisimiuni umiarsualiviutileqatigiinnik pilsersitsinissaq kissaatigisimavaat, tassani Arctic Circle Business allattoqarfittut atuussimavoq, Juliane Henningsenilu taamaalilluni ingerlatseqatigiiffimmik pilersitsiniarluni suliamut maanna ingerlanneqartumut ilisimasaqarluareerpoq.

Juliane Henningsen aamma Arctic Circle Businessimi pisortaanertut, Kangerlussuup siunissaa pillugu suleqatigiissitat, Qeqqata Kommuniani aamma Ineqarnermut Attaveqaatinullu Naalakkersuisoqarfimmi atorfilittanit inuttaqarttut ataatsimiinnerannut peqataasarpoq. Suleqatigiissitat aamma timmisartoqarfiup siunissaanut kiisalu Kangerlussuup Sisimiullu akornanni aqqusinissamut tunngatillugit takorluukkanik assigiinngitsunik qulaajaasussaapput.