quiassuaatiginninneq

Hans Jukkup Christianshavn tiguaraa

Quiasaarisartoq, nipilersortartoq TV-iimilu aqutsisoq Hans Jukku Noahsen Nordatlantens Bryggemi tallimanngormat unnukkut aliikkusersuivoq, issuaasaqattaarluni, ilaatigut atoqatigiittunik, Jonathan Motzfeldtiugaluarlu issuarlugu oqalulluni

Hans Jukku Noahsen aliikkusersueqataalu Nukannguaq Geisler

Københavnimi Nordatlantens Bryggemi tallimanngormat unnukkut kalaallisut aliikkusersuineq ingerlarsorfiusoq akunnerni marlunni ingerlanneqarpoq, ilaatigut imminut ilaarutiginniffiusumik, atoqatigiittut nipaannik issuaalluni kiisalu kalaallit politikerit nipilersortartullu nuimasut issuarlugit oqalulluni.

Isiginnaariat amerlanerpaamik 80-it quiasaarisartoq, nipilersortartoq TV-iimilu aqutsisoq Hans Jukku Noahsen, tunuarsimaanngivilluni atoqatigiittulersaartoq, issuaasaqattaartoq mitaajaqisaqattaartorlu isiginnaarpaat.

Ilaatigut naalakkersuisut siulittaasorisimasaat Jonathan Motzfeldtiugaluaq issuarneqarpoq, Kalaallit Nunaannilu politikkikkut pissutsit sakkortuumik isornartorsiorneqarlutik.

Naalakkersuisut siulittaasuat Kim Kielsen, Siumut, aamma avaqqunneqanngilaq. Quiasaarisartoq Kielsenip Paamiormiutut oqaluttarnera assaalu saamerleq sisamanik inualik issuarlugit oqalulermat isiginnaariat illariilingajapput.

Illarneq peqqinnartoq

Psykoterapeut Henriette Berthelsen isiginnaartut akornanniippoq, taassumalu aliikkusersuinerup timikkut tarnikkullu peqqinnartuunera qularutiginngilluinnarpaa. Taanna isumaqarpoq paquminartut oqiliallannartumik sammineqaleraangata peqqinnartuusartoq. Timi nukissaqarnerulersarpoq, inuunermullu nuannersumik isiginnittaaseqalersimalluni angerlartoqarsinnaasarluni, nassuiaavoq.

- Arraami, quianartorujussuuvoq. Issuaanerani immitsinnut takusinnaasarpugut. Tassa imminut ilaarutigineq inuillu ilisimaneqarluartut eqqumeequtinnguinik illaruaatiginninneq pitsaanerpaagaangat, Henriette Berthelsen naliliivoq.

- Uanga immikkut eqqortitutut misigivunga Lars Emil Johansenip issuarneqarnerani imminut takusinnaagama, tassanimi politikeri Facebookimiittuaannartartutut issuarneqarpoq, Henriette Berthelsen oqarpoq.

- Aliikkusersuineq annikitsualuit nalinginnaasumik nipituumik eqqartorneqartanngitsut sammineqarnerisigut oqiliallatsitsivoq, tamatumalu peqatigisaanik issuaanerni taakkunani immitsinnut takusinnaalluta illaatigisinnaallutalu. Peqqinnartuuvoq, tassanngaanniillu eqqarsaatissinneqarsimalluni qungujulluni ingerlaqqittoqarsinnaalluni, psykoterapeuti oqarpoq.

Powered by Labrador CMS