Juaaka Paamiuni ima aliikkusersuissaaq

Sapaatip akunnera 18 alakoorfiunngitsoq aallarnisarlugu Paamiuni Juaaka nipilersuataartinneqassaaq tallimanngorpat arfininngorpallu.

Tallimanngornermi ullaakkut nalunaaqutaq 10.00-mit 11.00-mut katersortarfimmi Taqqissuummi 'affarmik nipaannarmik' Tuviisami atuartunut ilinniartitsisuinullu tusarnaartitisoqassaaq. Tassani Juaakap meeqqanut erinarsuusiani, meeqqat pinnguatitoqaannik qittasitoqqanillu ilallugit aliikkusersuutiginiarpai, taallanik atuaasarnermik akullattaarlugit.

Unnuk taannattaaq katersortarfik Paamiormiunut piumasunut tamanut ammassaaq, tassani Juaaka tusarnaartitsissammat marlunnik immikkoortortalimmik.

Immikkoortup siulliup imarissavai taalliat aamma atuakkiamit 'Naleqqusseruttortut'-mit tigusillattaalaarneq aamma maanna atuakkiarineqartumit 'Inukassak-nit', tamakku erinnanik akunnilertarlugit aliikkusersuutigineqassapput.

Immikkoortup aappaani højtalerit nipittorneqassapput Juaaka Band tamarmiulluni tusarnaartitsissaaq. Juaaka Band ukuupput: Juaaka (erinarsortoq guitarertorlu, Pilu Noahsen (erinarsortoq) Leif Immanuelsen (supputaasaq,pattagiaq, erinarsortoq), Juuna Zethsen (el-guitar, erinarsortoq), Hans Jørgen Damgaard (bas, erinarsortoq), Kristian Otto Therkildsen( tumerparpaartoq) – taakku appisimaavataarniarput.

Imigassartaqassanngilaq
Arfininngornermi ullaap tungaani utoqqaat illuarmiut taallanik erinnanillu aliikkusersorneqassapput.
Tusarnaartitsinissanut iserneq akeqassanngilaq, aaqqissuussinerillu tamarmik aalakoornartulinnik imigassartaqassanngillat.

Sermersooq Paamiuni sunngiffimmi sammisassaqartitsisoq ( nipilersortartoqallu) Enok Poulsen, Paamiut-Asasara, aaqqissuussisuuvoq, tusarnaartitsinissallu aningaasaliiffigineqarput Tips- & Lotto-mit, aamma Aningaasaateqarfik Sermeq-mit.

- Enok Poulsenip qaaqqusinerata aaqqissuussiniarneq tamaat aallartippaa, nuanneqaarlu Paamiuliarniarnerput iluatsimmat. Ukiuni 45-ini nipilersortarlungalu assigiinngitsutigut aliikkusersuisarsimavunga- kiisamili aatsaat – siullerpaamik – Paamiuni tusarnaartitsisussanngorpunga. Assorsuaq nipilersoqatikkalu qilanaarpugut, Juaaka oqarpoq.

Tulliani Norgemut
Paamiuni nipilersoriiginnarluni Juaaka Norgeliarluni aallassaaq, tassani atuakkanut nunat tamalaat festivalianni “bogstavelig talt” quligiluassaanni 1 – 4 maj, Tvestrandimi pisussami peqataassalluni. Taanna suleqatigiiffiup Organisation of Booktowns aaqqissuussaraa