Kommuneqarfik Sermersooq pitsaasumik ilaatitsinermut politikkeqassaaq.

Kommunip nittartagaani tamanna atuarneqarsinnaavoq, tassani apersuilluni misissuinermik aallartitsisoqarsimavoq, pingaartumik nuuttunut saaffiginnippoq.

Misissuineq kommunip ilaatitsinermut politikkianut tunuliaqutaassaaq, taannalu politikerit suliarissavaat aalajangiiffigalugulu, kommunalbestyrelsimut ilaasortaq IA Juaaka Lyberth, taama ilisimatitsivoq, misissuinermik taanna suliaqartitsisuuvoq. Nuuk illoqarfik nunanit tamalaaneersunit innuttaasoqarpoq, politikerillu tamanna pitsaasuunerarpaa.

- Danskit savalimmiormiorpassuillu kisiisa eqqarsaatiginngilakka, Asiamiut amerlasuut, pingaartumik Thailandimit aamma Filippinerineersut kommuninnguatsinni najugaqartut, taanna oqarpoq.

Kulturi, oqaatsit aamma naleqartitat

Taakkartorneqartoq kingulleq illoqarfiit pingaarnersaasa innuttaasuisa akornanni annertusiartorpoq, Juaaka Lyberthillu oqarnera naapertorlugu kommunip nuannaarutiginissaa pikkoriffiginerulissavaa.

- Nuuk-centerimi pisiniarfimmut imaluunniit cafemut iseraanni, Hotel Angmassalimmut imaluunniit allarluinnarmut iseraanni, Asiamiunik sulisoqartut takussavatit, taakku sulilluarput. Allatut oqaatigalugu: Illoqarfimmi takussaapput.

Kommuneqarfik Sermersooq qanoq ittumik ilaatitsinermut politikkeqassava, taamaalilluta kulturerput, oqaatsivut naleqartitavullu innuttaasunut nutaanut, kommunitsinni najugaqarusuttunut saqqummiunneqartarnissaat qulakkeersinnaassagatsigit? Juaaka Lyberthip oqarnera naapertorlugu taanna apeqqut pingaaruteqarpoq, inuiaqatigiinni avissaarsimasunik ajornartorsiutinillu nassatarisaannik peqalinnginniassammat.

- Apersuilluni misissuinerup siunertaraa, inuit illoqarfimmut nuunnerup qanoq inneranik ilisimasaqartut attaveqarfigineqarnissaat. Politikkimik atorsinnaasumik suliaqarusuppugut, taamaattumillu piviusumit misilittakkanik tunngaveqartinniarparput, taanna oqarpoq.

Ilaatitsinermut politikki pitsaasoq neriuutigigaa

Juaaka Lyberthip innuttaasut akissutaannik suli pissarsinngikkaluarluni, danskisut kalaallisulluunniit oqalussinnaanngikkaanni, nalinginnaasumik Kalaallit Nunaanni pisortat paasiniaaffigiuminaassinnaasut isumaqarpoq.

- Immaqa tuluttut imaluunniit oqaatsini allani kiffartuussinissamut pitsaanerulertariaqarpugut. Apeqqutit taamaattut innuttaasunik peqataalersitsinermik suliami qulaajassallugit neriuutigaagut.

Apersuilluni misissuinerup inerneranit ilisimasat ilaatigut tunuliaqutigalugit kommuni ilaatitsinermut politikkimik pitsaasumik nassuiaasiorumaartoq, kommunimi politikerip neriuutigaa.

- Innuttaasut nutaat aningaasaqarnitsinnut tapertaanerat pitsaasuuvoq – aamma kulturiminnik. Kommunitsinnilu immikkoorluni inuiaqatigiinnermik pilersitsisoqannginnissaa pingaaruteqarpoq, nunanit assigiinngitsuneersorpassuit immikkut inuuneqarlutik – ataatsimoornatik, taanna oqarpoq.