Juaaka Lyberth kommunimut qinigassanngortippoq

Ullumi marlunngornermi ullup-qeqqa kommunimut qinigassanngortinniarluni nalunaarnissamut killissaritinneqarpoq. Kommuneqarfik Sermersuumi inuit ilisarisimaneqartut kommunalbestyrelsimut qinigassanngortillutik nalunaarsimapput.

Nipilersortartoq, taalliortoq atuakkiortorlu Juaaka Lyberth politikkerinngoqqikkusuppoq. Kommuneqarfik Sermersuumi nuliata Asii Chemnitz Narupip 2019 tikillugu borgmesteriuffigisimasaani IA sinnerlugu kommunimut qinigassanngortippoq.

Juaaka Lyberth Uummannami 1952-imi inunngorpoq, 1979-imilu Siumut taperserniarlugu Københavnimi immikkoortortaqarfimmik pilersitsisoqarmalli politikkikkut suliaqartarsimalluni. Siumut sinnerlugu uranimut akerliliilluni erinarsuummik suliaqarsimavoq aamma atomip nukinganik nukissiorfiliornissamut akerliliiniarluni Kalaallit Nunaanni ilisarnaatissamik suliaqartoqarneranut siuttuusimavoq, ilisarnaat ullumikkut peqatigiiffiup Uraani Naamiup atortarpaa.

Juaaka Lyberth ukiut ingerlanerini politikkikkut assigiinngitsutigut akuusarsimavoq, soorlu 1990-ikkunni Siumut sinnerlugu paasititsiniaasarsimavoq aamma Kuupik Kleistimut siunnersortaasimavoq 2014-imilu aamma 2017-imi IA sinnerlugu paasititsiniaasarsimalluni.

Ataqatigiinneq nukittorsarniaraa

Siumulli sinnerlugu suliaqartarsimanera qanganngorpoq, Juaaka Lyberth erseqqissaavoq.

- Inuunerup ingerlanerani politikkikkut nikittoqarlunilu isummatigut naleqartitatigullu inerittoqartarpoq. Siumumit talerpiup tungaasnut sangusoqarsimasoq takusimavara aamma avatangiisinut, nukissiuutinut mingutsitsinngitsunut uranimullu isummat allanngorsimapput, taanna oqarpoq.

Kommunimi politikkerinngornissamut aalajangersimaneranut tunngaviulluinnarsimasoq tassaavoq nunami ataqatigiittoqarneranut tunngassuteqartoq.

- Nuummi innuttaasutut Naalakkersuisuusartunit assigiinngitsunit Siumumit aqunneqartunit Nuuluariartortoqarnera takusimavara. Taamatut pissuseqartoqalernera najukkami politikkeritut akiorniarpara.

Ilisarisimaneqartoq alla aamma qinigassanngortittoq

Qinigassanngortittoq alla politikkimi nutaajusoq tassaavoq Erla Vinther, taassuma suliarisartagarpassuarmi saniatigut 1970-imi martsip 14-iani gassi qaarmat ajunaartut Nuummi eqqaassutissalerneqarnissaat sulissutigisimavaa.

- Sassarpunga qinigassanngortinnissara arlaleriarlunga eqqarsaatigisarsimangakku. Ukiorpassuarni piffissara inuttullu inuunera inuiaqatigiinnik sullissinermut atortarsimavakka, maanna sullissisarnera kommunalbestyrelsi aqqutigalugu ingerlakkusullugu, Erla Vinther Sermitsiaq.AG-mut oqarpoq.

Powered by Labrador CMS