Nuuk
Juaaka Katuami arfininngorpat aliikkusersuissaaq
Juaaka Lyberth nipilersoqatigisartakkanilu Juaaka Trio Katuami arfininngorpat aliikkusersuissaaq
Kulturip illorsuani Katuami pissanganartumik taallanik erinnanillu unnussiuaartoqassaaq arfininngornermi nalunaaqutaq 19.00-imit.
Atuakkiortoq erinarsuusiortorlu Juaaka Lyberth nammineq allallu taalliaanik atuffassiniarpoq, atuakkiaminillu 'Naleqqusseruttortut'-nit tigusillattaassalluni. Akornisigut nipilersoqatigiit Juaaka Trio nipilersortassapput, taakkunanilu Juaaka oqaluttuarisarumaarpaa erinarsuusiamini taallat pilersimanerat.
Atuakkiaa 'Naleqqusseruttortut' Nunat Avannarliit atuakkianut nersornaataannik
nersornaaserneqartussatut 2014-mi innersuunneqarpoq.
Tusarnaariat periarfissaqassapput atuakkat imaa pilersimaneralu pillugit apeqquteqarnissaminnut.
Unnummi pulaartitut Juaakap qaaqquaa taalliortoq qalipaasartorlu Augusta M Jeremiassen. Aappariinneq pillugu Augusta pissanganartunik misigissuseqarluartunillu taalliaqarpoq.
Nipilersoqatigiit Juaaka Trio, tassaapput Juaaka erinarsorlunilu guitarertoq, erinarsortartoq Pilu Noahsen, tulleertoq aamma supputaasartartoq Leif Immanuelsen.
1969-mi Juaaka kisimiilluni aliikkusersueqqaartoq Katuaq nalunaarpoq. Taamaattumik unnussiuaarneq 'taallat erinnallu' ukiunik 45-ngortorsiorluni malunnartitsinermi unnussiornerit siulleraat. 45-ngortorsiornermi malunnartitsilluni unnussiuaarluni aappat pissaaq, Katuami oktobarip 31-ani, Juaaka Band tamarmiusoq Katuap paarlersuani tusarnaartitsilerpat.