Josef Chemnitz Frederiksen nunanut allanut unammisartunut peqataanissamut piareeqqasoq

Josef Chemnitz Frederiksenip assammik arsartartuuneq nuannarisarilluinnarpaa. Nukappiaraanermini Nuummi klubbit, siullermik NUK kingusinnerusukkullu GSS ilaasortaaffigisimavai, taakkunani målmanditut unammeqataasarsimalluni. Josefi ukiunip pingasuni kingullerni Danmarkimiittumi Oure Kostgymnasiumimi assammik arsarnermi ilinniarsimavoq. Ilinniarnertuunngorniarfimmi ilinniagassaminik paaqqinninnermi saniatigut atuarfimmi atuarfiullu qanittuaniittumi GOG-imi unammeqataasarlunilu sungiusaqataasarsimavoq. Atuarfimmi oqartoqartarneratuut: Atuarfik ”narsaammiippoq”. Erseqqinnerusumik oqaatigalugu, Svendborgimit 10 kilometerisut ungasitsigisumi illoqarfeeqqami Oure-miippoq.

Josefip Sermitsiaq.AG-mit oqaloqateqarnermini oqaluttuaraa, Oure Kostgymnasiumimi ukiuni pingasuni ilinniartuunera nuannerluinnarsimasoq.

- Soorunami aallaqqaammut oqimaassimavoq. Qujanartumilli qaammatialuit ingerlareersut imminut isumagisinnaallunga paasivara. Maani atuassagaanni immikkuullarilaartuusariaqarpoq, Josef oqaluttuarpoq.

-Immitsinnut qanittuararsuuvugut. Ataatsimoorussatsinnik atortoqarpugut. Taamaammat kisimiippallaarneq ajorpugut. Minnerunngitsumik aamma annertuumik unammilleqatigiittoqartarpoq. Pitsaanerpaat maani atuartarput, taamaamma assammik arsarnerme karakteerilluunniit apeqqutaasanngillat. Angusarisat matumani apeqqutaasarput. 300-t inulaarlugit Oure Kostgymnasiummimi atuartuupput.

Assammik arsartartut klubbiinut ingerlatitseqqiisartoq

Josef Chemnitz Frederiksen piffissami unammisaqataarfiusimasumi qanittukkut naammassineqartumi GOG-p unammisartuisa aappaanni Danmarkimi 2. divisionimi unammisartuni målmandit pingasuusut ilagisimavaat.

Oure Kostgymnasium ukiorpassuarni assammik arsartartartunik pikkorilluinnartunik klubbinut assigiinngitsunut, pingaartumillu GOG-mut ingerlatitseqqittartuusimavoq. Danskit nunanut allanut unammisartorpassui, soorlu Mikkel Hansen, qatanngutigiit Niklas aamma Magnus Landin piffissamilu kingullermi Mathias Gidsel Oure Kostgymnasiummimi atuartuusimapput.

Josef Oure Kostgymnasiummimi naammassingajalerpoq. Karakterii kusanartuupput juunillu 20-ani nasartaassalluni. Ulloq taanna Josef Nunatsinni nunanut allanut unammisartut peqatigiartorlugit Maribomukassaaq, tassa nunanut allanut unammisartut nunarsuarmi pissartanngorniuttoqarnissaanut anngunniukkiartorlutik Mexicomukannginneranni.

Josef nunanut allanut suli unammeqataasimanngilaq, taamaammat Mexico City-mi siullermeersumik unammeqataassalluni.

- Atuarfimmi matumani kammalaaterpassuarma paasisinnaanngilaat, ilinniarnermik naammassinninnitta nalliuttorsiutigineranut peqataaniannginnera. Uangali qularuteqanngilanga, assammimmi arsartartuunissara nalunnginnakku.

- Mexicoliaqataallunga nunanut allanut unammisartunut peqataaqqaarnissara takorluugarisimavara, tamannalumi piviusunngulerpoq.

Mexicomi oqaatsinik ajornartorsiuteqarnavianngilaq. Josefimi 16-inik ukioqarluni ilinniartut paarlaasseqatigiinneranni ukiumi ataatsimi Chilemiissimanermini spanskisut ajornatorsiutitaqanngitsumik oqalulluarsinnaavoq.

Siunissaq

Josef Chemnitz Frederiksen qaammatit kingulliit atorlugit assammik arsartartut klubbianik ilaasortanngorfigisinnaasaminik ujaasisimavoq, assammik arsartartutut suli pitsaanerulerusulluni unammillunilu ineriartorfigisinnaasaminik.

- Agenteqarpunga misissuisumik, tamannalu iluatsilluarumaarpoq, Josef erseqqissaavoq.

Norgemi Sverigemilu klubbit tamarmik pitsaanerit tullianniittut attavigineqarsimapput. Ilungersuutigisalli suli iluatsitsiffiunngillat. Assammimmi arsartartut akornanni unammilleqatigiinneq sakkortuujuvoq, Danmarkimilu pikkorissorsuit amerlalluinnartuullutik.

- Kalaallit Nunarput Mexicomi anngunniuttoqarnerani ajugaalluni nunarsuarmi pissartanngorniuttoqarnissaanut anngutissappat periarfissamma annerulernissaat qularnanngilaq, målmandi 1.86 meterisut angissusilik oqaloqatigiinnerput nuannersoq naggaserlugu oqarpoq.