Jørn Skov Nielsen oqaaseqaqqusaanngilaq
Naalakkersuisoqarfimmi pisortaasimasoq Greenland Mineralsimilu pisortanngorlaaq Jørn Skov Nielsen tupaallannartumik allamik suliffittaarnini pillugu oqaaseqaqqusaanngilaq. Jphn Mair suliffeqarfimmi pisortaanerusoq ukiuni kingullerni tusagassiorfinnut nalunaaruteqartartoq ilisimatitsivoq.
Jørn Skov Nielsen aatsitassarsiorfimmi Greenland Mineralsimi akerleriissutaaqisumi pisortatut atorfinitsinneqarsimanera pillugu nutaarsiassaq saqqummermat, Sermitsiaq.AG-mit aalajangerneq pillugu itisileeqqullugu apersorusunneqarsimagaluarpoq. General Minerals Kuannersuarni aatsitassanik qaqutigoortunik uranitaqartunillu piiaanissamut aatsitassarsiorfimmik ammaaniarluni sulissuteqarpoq.
Sermitsiaq.AG qinnuigineqarsimavoq apeqqutinik mailikkut nassiusseqqullugu, apeqqutilli marluinnaat akissuteqarfigineqarsimapput. Jærn Skov Nielsenili nammineerluni akissuteqarsimanngilaq, pisortaanerli John Mair akissuteqarsimallui.
Tunngaviusoq
- Suliffeqarfitsinni sulisunut tunngatillugit kikkut tamat oqallinnerannut tunngaviusumik peqataaneq ajorpugut, John Mair mailikkut akissuteqaammi erseqqissaavoq.
Jørn Skov Nielsen pisortatut atorfik pillugu qanga saaffigineqarsimanersoq aamma qanga isumaqatigiissuteqartoqarsimanersoq pillugit apeqqutigineqartut akissutigineqarput:
- Jørn Skov Nielsenip suleqatigineqarsinnaanera pillugu oqaloqatigiinnerit 2020-mi juunip qaammataani aallartinneqarput, 2020-milu juunip qaammataata naanerani isumaqatigiissuteqartoqarluni, John Mair ilisimatitsivoq.
Jørn Skov Nielsenip atorfimminnit soraarniarnini aggustip qaammataani nalunaarutigaa. Maajip naanerani pisortatigoortumik soraarpoq, juunilli qaammataani Naalakkersuisut Siulittaasuata Naalakkersuisoqarfianiippoq, pisortanngorlaaq Isak Nielsen Kleist suliffittaavanut pitsaasumik isertinneqarnissaa qulakkeerniarlugu.
Akissuteqarfigineqanngitsoq
Sermitsiaq.AG-mit paaserusunneqarsimagaluarpoq, Jørn Skov Nielsenip pisortanit qaffasissumik atorfeqareerluni, namminersortuni qaffasissumik atorfeqalernini qanoq igineraa. Minnerunngitsumillu aatsitassarsiorfimmi Kalaallit Nunaanni innuttaasut misigissutsitigut isummatigullu isumaqatigiinngissutigeqisaanni sulilernissani qanoq isumaqarfigineraa.