Toqusoq
Jørgen Hertling toquvoq
Jørgen Hertling Aasiammiu kalaallini politimesterit siullersaraat.
Eqqartuussissuserisoq aamma politimesteriusimasoq Jørgen Hertling 89-inik ukioqarluni toquvoq. Sivisuumik napparsimareerluni angerlarsimaffimmini toqukkut qimaguppoq. Ilaqutaasut taama nalunaaruteqarput.
Jørgen Hertling januaarip 15-anni 1928-mi inunngorpoq, 1956-imi Københavnip Universitetiani ilinniakkani cand.jur. inerpaa, taamaalillunilu qatanngutini Knud Hertling peqatigalugu kalaallini siullersaallutik inatsisilerisutut atorfininniatut soraarummeerput.
Taanna 1963-imi eqqartuussissuserisutut suliffimmik ingerlatsisinnaatitaalerpoq, ukioq taanna Kalaallit Nunaanni politimesteriugallartinneqalerpoq, 1964-imilu toqqarneqarluni. Taamaalilluni kalaallini siullersaalluni 1971-ip tungaanut taanna atorfigisimavaa.
Danmarkimi kalaallit pillugit apeqqutinut Bikubenimi atorfinitsinneqarpoq. 1973-imi Københavnimi kalaallinut siunnersuisarfimmi 'Poq'-mi siulittaasunngorpoq.
1982-imi Jørgen Hertlingip Københavnimi eqqartuussissuserisoqarfimmik pilersitsivoq; 2000-imi pisortanit akuerisatut eqqartuussissuserisunngorpoq.
Tigulaarinniffik: Dansk Biografisk Leksikon