Jonathan Motzfeldt ullumikkut 80-iliissagaluarpoq

Jonathan Motzfeldtip Nunatsinni nutaaliaasumut sunniuteqarsimanera annertuallaartutut takorlooruminaappoq.

Taanna ‘pingajoqqat’ namminiilivinnissamik anguniakkamik siuttut ilagaat, ukiorpassuarnilu Namminersornerullutik Oqartussat malunnaateqarfigalugit. Taassuma ilai ilisimaneqareersutut tassaapput Moses Olsen aamma Lars-Emil Johansen.

Kisianni Jonathan Motzfeldt nuannarineqarluni nunami siuttunngorpoq.

- Jonathan Motzfeldtip naalakkersuinermik suliaqarnermini aamma inuttut piginnaasaq nalitooq pigaa, tassa inunnik katersuutsitsisinnaaneq, Sermitsiami aaqqissuisuuneq, Poul Krarup taama oqarpoq.

Taanna 1979-mit 1991-imut naalakkersuisuni siuilittaasuuvoq, aamma 1997-mit 2002-mut, tamatumalu saniatigut naalakkersuinikkut tatigineqaatitut kisissaanngitsunik atorfeqartarluni. Namminersornerlutik Oqartussat Isumalioqatigiissitaani aamma ukiorpassuit qaangiuttut kalaallit danskillu Namminersorlutik Oqartussanut Isumalioqatigiissitaanut ilaasortaanikuulluni. Ilisimaneqartutullu aamma ukiorpassuarni Siumumi siulittaasuusimavoq.

- Taanna inoqatiminut nalituumik sunniisinnaassuseqarpoq, taamaalilluni inuit tusarnaartitarpai. Inunnullu allanut aamma tusarnaarsinnaassuseqarpoq. Naalakkersuinermik sulialinnut isumaqatigiinnermik aamma inunnik katersuutsitsinermut piginnaasaq nalilerneqarsinnaanngitsoq pigalugu, Poul Krarup oqarpoq.

- Aamma inuit tamaasa oqaloqatigisinnaavai, qaffasissut qaffasinngitsullu assigiimmik. Dronning, statsministeri imaluunniit Nuummi angerlarsimaffeqanngitsoq peqatigitillugit allanngorneq ajorpoq. Avatangiisimini tatiginassutsimik pilersitsisarpoq, siunissamullu neriuuteqalersitsisarluni, kikkullu tamarmik nuannaraat.