John Thorsen qinersereernerup kingorna: Ingerlariaqqissaagut

- KAK eqqissisoqarnissaat siullertut sulissutigissavara.

John Thorsen sapaammi Kalaallit Arsaattartut Kattuffiani (KAK) siulittaasutut qinerneqaqqittoq, Sermitsiaq.AG-mut oqarpoq. Ataatsimeersuarnermi Kalaallit Nunaanni Arsaattartut Kattuffia atia nutaamik taarserneqarpoq.

Ataatsimoorfik

John Thorsen ikannerussuteqalaarluni kalaallit isikkamik arsaattartut kattuffiani siulittaasutut qinerneqarpoq. Taanna qinersinermi aqqanilinnik qinernerneqarpoq, unammillertaalu Kent Kielsen qulinik qinerneqarluni.

- Kattuffimmi katersuuffeqarnissaq pingaaruteqarluinnarpoq, tamannalu sulissutigissavarput. Kattuffiummi qanoq aqunneqarnissaa assortuussutigineqartut kikkut tamarmik takusinnaavaat, John Thorsen oqarpoq.

Atuaruk:

Lærring periode

- Aqqanilinnik qinerneqarlunga siulittaasunngorputnga, taamaattoq kattuffiup qanoq aqunneqarnissaanut allat allatut isummersimaneri soorunami puiussanngilarput tusarnaassallutigilli, John Thorsen KAK'mi eqqissititsinissamik qularuteqarani erseqqissaavoq.

Taanna ukioq manna nunanut allanut unammisartunut sulittaasoq Tekle Ghebrelulip soraarsitaanerata kingorna siulittaasuuffimminit tunuarpoq. Soraarsitsilluni aalajangiineq John Thorsenip peqataaffigisinnaasimanngilaa.

- Siumut sammisumik anguniangaqarluta ingerlariaqqisaagut. Piffissaq kingulleq pisoqarsimasaqaaq, piffissamilu tassani ilikkangaqaqaagut, John Thorsen oqarpoq.

Sungiusaasumik atorfinititsineq

Ataatsimeersuarnermi nammineq peqataanngilaq. Taamaammaat siulersuisuni ilaasortanngortut allat suli naapissimanngilai.

- Nunat tamalaat isikkamik arsaattartut kattuffiani Fifa'mut Uefa'mullu ilaasortanngornissaq tunngavingaarput. Suliaq nanginneqassaaq. Siulersuisuni isumaqatigiissutigissavarput anguniakkap anguniarnerani sukkuussanerluta. Unammisartunillu ineriartortitsinerput attatiinnassavarput, taanna oqarpoq.

- Angutit nunanut allanut unammisartut sungiusaasoqanngillat. Qaqugu sungiusaasumik atorfinititsisoqassava?

- Siulersuit siullermik ataatsimiinnerani tamanna eqqartussavarput. Tassani tullertut iliuusissarput eqqartussavarput. Nunanut allanut unammisartut aamma eqqartussavagut. Futsalimik nunanut allanut unammisartut decemberip qaammataani unammersuarnermut peqataasussaapput, sungiusaasoqarnissaallut pingaaruteqarpoq, John Thorsen akivoq.