John Mair Kuannersuit pillugit: Ammasumik oqaloqatiginnikkusuppugut
Greenland Mineralsimit Jørn Skov Nielsen oqaaseqaqquneqanngimmat, imaanngilaq Kuannersuarni aatsitassarsiorfissaq pillugu kikkut tamat oqallinnerannut suliffeqarfik akuliunnianngitsoq. – Ammasumik oqaloqatiginnikkusuppugut, John Mair Greenland Mineralsimeersoq neriorsuivoq.
Greenland Mineralsip Kuannersuarni aatsitassanik qaqutigoortunik uranitalinnik piiaanissaq anguniarlugu, aatsitassarsiorfimmik ammaaniarnermut atatillugu VVM-imut tunngatillugu pisortatigoortumik tusaniaanisssaq aallartingajalerpaa.
Greenland Mineralsimi pisortaanerup John Mairip Sermitsiaq.AG-mut ilisimatitsissutigaa, innuttaasunik ataatsimiitsitsisarnissaq qilanaarineqartoq, naalakkersuisut sinniisuutitaannut, ilisimatuussutsikkut ilisimasalinnut aatsitassarsiorfimmullu apeqquteqartoqarsinnaalluilu oqaaseqartoqarsinnaasumik ataatsimiitsitsisarnissaq.
- Suliffeqarfiup politikkerivaa, naalakkersuisunik soqutigisalinnillu allanik ammasumik oqaloqateqartarnissaq, John Mair Jørn Skov Nielsenimut allamik atorfittaarneq pillugu oqaaseqaqqusinngitsoq erseqqissaavoq.
Isumaqatigiinngissutaasoq
Kuannersuarni aatsitassarsiorfimmik ammaaniarneq, innuttaasut uranimik piiaasoqarniarnera aamma avatangiisinut peqqissutsimulu ulorianartuunera pissutigalugit isumaqatgigiinngissutigaat.
John Mairip tassunga atatillugu erseqqissaatigaa, aatsitassanik qaqutigoortunik piiaanermi, ilaatigut nukissiuutinik ataavartunik pilersuinissamut aamma gassinik silaannarmik kissatsitsisartunik aniatitsinerup annikillisarneqarnissaanut, nunarsuarmi mingutsitsinngitsumik inerisaanermik nukittorsaaqataasoqarniartoq.
- Kalaallit Nunaanni aatsitassarsiornerit allat assigalugit piumasaqaataavoq, aatsitassarsornermi nunani tamalaani avatangiisit, silap pissusaa, peqqissuseq isumannaassuserlu eqqarsaatigalugit periuserineqartartoq malillugu sulisoqartarnissaa. Taamatut suleriaaseqarneq, Greenland Mineralsip inuussutissarsiummik ingerlatsinermi politikkianut qitiusumillu naleqartitaanut naapertuuppoq, tassa aalajangiinerni tamani aningaasaqarneq, avatangiisit inooqataanerlu eqqarsaatigalugit sulisoqartarpoq, John Mair erseqqissaavoq.