Johannes Groth nunanut allanut unammiartortartunut sungiusaasuujunnaarpoq
Arnat assammik arsartartut nunanut allanut unammiartartut sungiusaasuat, Johannes Groth assammik arsartartut kattuffiat isumaqatigiissuteqarfigalugu taamaatippoq. Nunanut allanut unammisartut nunarsuarmi pissartanngorniuttoqarnissaanut anngunniuttoqannginnerani sungiusaasussarsiortussanngorput.
Arnat nunanut allanut assammik arsarlutik unammiartartui nutaamik sungiusaasussarsiortussanngorput.
Assammik arsartartut kattuffiat, TAAK, aamma Johannes Groth isumaqatigiissuteqarput Johannes Groth taamaatissasoq. Assammik arsartartut kattuffiat tusagassiorfinnut taama nalunaaruteqarpoq. Johannes Groth nammineq atukkani pillugit, namminerlu piffissarisani allamut atorusullugu taama aalajangertoq nassuiarneqarpoq.
- Piffissaq taamaatiffik pitsaanerpaajugunanngikkaluarpoq, augustimimi pissartanngorniunnissat qanillilluinnarput. Unammiartussalli nukissaqarluarlutik aallarumaarput, TAAK allappoq.
Angujumasaq angugaa
Johannes Groth sungiusaasutut aallartikkami GSS-ip arnartaannut sungiusaalluni 2011-mi aallartippoq. Arnat nunanut allanut unammiartortartuinut sungiusaasup ikiortaatut 2012-mi aallartippoq, 2016-imilu sungiusaasunngorluni.
Johannes Groth taamaatinnermini oqarpoq nunatta nunanut allanut unammisartui arnat pillugit angujumasani maanna angusimallugit:
- Nunanut allanut unammiartartugut maanna inissisimalluarput. Taamaatippunga nammineq aalajangikkannik, sungiusarnermut piffissaq pisariaqartinneqartoq uanga maanna tunniussinnaannginnakku. Nunarsuaq tamakkerlugu pissartanngorniunnissamut sungiusarnerit piffissamik annertuumik pisariaqartitsipput, Johannes Groth oqarpoq suleqataasimasunullu qujalluni.
Augustimi anngunniunnerit
- Angusat pillugit tulluusimaarsinnaavugut, nunanullu allanut unammiartartut arnat tamanik ajunnginnerpaanik kissaappakka, oqarpoq.
Nunanut allanut unammiartartut 2012-imili kattuffiup tapersersugaanik nunanut allanut angalangaatsiartarsimapput. Soorlu Islandimut, Puerto Ricomut, Cubamut aamma Mexicomut.
- Suna tamarmi ingerlalluassappat nunarsuaq tamakkerlugu pissartanngorniunnissaq augustimi tullinnguuppoq. Tamanna takorluukkani annersaavoq, siullermilli augustimi Pan-Am-eqqaassaagut, TAAK ilisimatitsivoq.