Jess Svane: Erngup sikullu tunisassiarineqarnerat ingerlarsorsinnaanngorpoq
Kalaallit Nunatta avammut niueqateqarnera aallartimmalli ajornartorsiutigineqartuartut ilagaat qanoq ililluni imeq sikulu iluatsilluartumik avammut nioqqutigineqarsinnaanersut periusissaq iluamik nassaarineqarnikuunnginnera. Siornatigut iluatsikkuminaatsinneqartoq taanna iluatsissinnaarpasilerpoq
Nassuiaaterpassuit, oqallinnerpassuit, partiit assigiinngitsut anguniagassatut siunniussarpassui, qineqqusaarnermi neriorsuutit, isumaqatigiissutit piviusunngungajaannartartut, naggataatigulli unitsiinnarneqartartut, tamakku ilaatigut aqqusaarneqartarput tunisassiornermik misileraalertigani.
Sermitsiaq allappoq.
Tassa ataasiakkaannguit iluatsittumik imermik sikumillu tuniniaasarnerminni iluatsitsinerat eqqaassanngikkaanni ataatsimut isigalugu nunatsinniit imermik sikumillu, nunatta naassaanngiusartumik sillimmateqarfigigaluaraa, avammut nioqqutissiorneq Naalakkersuisut Inatsisartullu isumalluutigisaattut takorluugaattullu annertutigisumik iluatsilluarnikuunngilaq.
Neqeroortitsinerit iluatsilluartut
Maannali paasinarsivoq iluarsiissutigineqarsinnaasut, aningaasatigut imminut akilersinnaanissaanut qulakkeerinninniutit ajornatsumik aaqqinneqarsinnaasut aqqutigalugit iluatsilluartumik pilersaarusiortoqarlunilu inuussutissarsiummut pulasoqarsinnaalerpoq, taamaalillunilu avammut nioqqutissiorneq aqqutissiuunneqarsinnaalerluni.
Tassa iluanaarutinit pissarsiassatut naatsorsuutigisat (royalty) aammalu ingerlatseqatigiiffinnut akileraarutit annikillisinneqarmata aningaasaliiumasinnaasut soqutiginninnerat annertuseqqinneqarpoq, maannalu tassa aningaasaliiumasut amerliartoqqilerput:
– Ungasinngitsumi sumiiffiit toqqakkat aalajangersimasut tallimat neqeroortitsissutigineqarput. Neqeroortitsinerit assut iluatsilluarput, tassanilu ingerlatseqatigiiffiit arfineq marluk imermik nioqquteqarsinnaanermut akuersissutit 16-it taakkununnga agguaanneqarput. Tassungaannarli killissanngilagut, tassami ilisimaneqartutut Kalaallit Nunarput nunarsuarmi annerpaat ilaannik, ilami immaqa annerpaamik periarfissaqarpoq pisuussutinik taakkunannga piumaneqaqisunik avammut tunisassiussalluni. Taamaammat maanna piareersarpugut neqeroortitsinerit tulliisa ingerlanneqarnissaannut, taamatuttaaq aningaasaliiumasinnaasut kajumissarniarlugit pilerisaarineq annertuumik ingerlanneqarpoq, inuussutissarsiornermut, nukissiuuteqarnermut, ilisimatusarnermut aammalu sulisoqarnermut naalakkersuisoq, Jess Svane (S) oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: