Jess G.: SIK-p partiiliortoqarnissaa sulissutigerusuppaa
Nunarput partiimi sulisartut atugaannik pitsanngorsaatinik suliaqarusuttumik amigaateqarpoq. SIK-mi siulersuisut taama isumaqarput, sulisartullu partiiannik pilersitsinissamut periarfissanik suliaqarusullutik.
Nunatta sulisartut partiiannik amigaateqarneranik, Jess G. Berthelsenip oqariartuutaa SIK-p siulersuisuunerinit tigulluarneqarpoq.
SIK-p siulersuisuuneri sapaatip akunnerani matumani pingasunngornermi ataatsimiipput, tassanilu sulisartut partiiannik pisariaqartitsinermik siulittaasup oqariartuutaa aamma oqaluuserineqarpoq.
- Siulersuisuunerit aamma qatsuppaat sulisartut atugaannut tunngatillugu politikkikkut annertunerusumik oqariartortoqartannginnera. Maluginiarpaat maanna partiiusuni annertunerusumik eqqumaffiginnittoqannginnera, tamannalu qatsulluinnarpaat, Jess G. Berthelsen oqarpoq.
Maajip aallaqqaataani oqalugiummini sulisartut partiiannik pilersitsinissamik isuma siulittaasup oqaatigaa. Isumassarsiaq igiinnarnagu SIK-p siulersuisuinit ataatsimiinnermi oqaluuserineqarpoq.
- Partiimik pilersitseqataanissamut isuma siulersuisuunernit oqaluuserineqaqqittussanngorpoq. Kattuffiup partiimik pilersitsinissamut ajattueqataanissamik soqutiginnissinnaavoq, SIK-mi siulittaasoq Sermitsiaq.AG-mut oqarpoq.
Atorfillit eqqummaariffigineqartut
Jess G. Berthelsen siulersuisullu, katillugit qulingiluaasut, qatsussippaat allat akissarsianut tunngatillugu isumaqatiginninnialeraangata politikerinit maluginiarneqarnerusarnerat.
Assersuutigineqarsinnaavoq perorsaasut akissarsiaat atugaallu Inatsisartuni aamma oqallisaalertarnerat.
- Sulisartulli, uagut ilaasortagut, pineqalertillugit soorlu politikerit qanii militat. SIK-p siulersuisuisa qatsulluinnarpaat ilaasortatta atugaasa politikkikkut eqqummaariffigineqannginnerat, Jess G. Berthelsen oqarpoq.
Taassuma erseqqissarpaa partiimik pilersitseqataanissamut tunngatillugu tigussaasumik suli inissiisoqanngitsoq. Aammali oqaatigaa partiiliortoqarnissaanut siulersuisut piareersimasut. Nammineq politikkimut isernissamut soqutigisaqarnersinnaanini tassani pineqanngitsoq oqaatigaa.
- Pineqanngilaq uanga politikkimut iserusunnersunga. Tamanna apeqqutaanngilaq. Pineqarporli ilaasortatta atugaasa pitsanngorsarnissaanut sulerusuttumik partiimik amigaateqaratta, oqarpoq.