Jess G.: Isumaqatiginninniarnerit aallartinneqaqqipput

SIK-p aamma Namminersorlutik Oqartussat akissarsiat pillugit isumaqatiginninniarnerat unittooqqanikuulluni aallarteqqittoq Jess G. Berthelsen Sermitsiaq.AG-mut ilisimatitsivoq.

Isumaqatiginninniarnerit unittooqqanikuupput, tassani akissarsiat tiimimut 0,92 koruuninik qaffanneqarnissaannik Naalakkersuisut neqeroorutigisaat portørinit isornartorsiorneqangaatsiarnikuulluni.

Tallimanngormalli isumaqatiginninniarput

Isumaqatiginninniarnerit tallimanngormalli ingerlanneqartut SIK-mi siulittaasoq ilisimatitsivoq.

- Taamaattoq isumaqatiginninniarnerit qanoq inerneqassanersut suli oqaatigisinnaanngilara, Jess G. Berthelsen oqarpoq.

Suliumajunnaarneq periarfissaq kingulliuvoq

- Isumaqatiginninniarnerimmi qanoq nalilersinnaavigit?

- Tamanna oqaatigisinnaanngilara. Kisianni tassa isumaqatiginninniarnerit ingerlapput. Isumaqatigiittoqarsinnaanngippat sulisut suliumajunnaarnissaat tullinnguutissaaq, tamannalu periarfissaq kingulliussaaq, Jess G. Berthelsen akivoq.