Jess G.-p ineqarnermut akiliutit qaffanneqarniarnerat akerlerilluinnarpaa
SIK-mi siulittaasup Jess G. Berthelsenip Namminersorlutik Oqartussat inissiaateqarfiini arfineq-marluusuni ineqarnermut akiliutit qaffanneqarnissaannik Naalakkersuisut aalajangersimanerat akuersaarsinnaanngilluinnarpaa. - Naalakkersuisut akinik qaffaaniarneq unitsinngippassuk, tullissaanik akissarsiat isumaqatiginninniutigineqalerpata qaffaatissatut innersuussat saniatigut aningaasarsiaqarnerulersitsinissaq piumasaqaatigissavarput, siulittaasoq oqarpoq.
Namminersorlutik Oqartussat Nanortalimmi, Paamiuni, Nuummi, Maniitsumi inissiaateqarfiisa ilaanni aamma ilaqutariinnut illuni illunilu affarleriinni ineqarnermut akiliutit 2022-mi januaarip aallaqqaataani qaffanneqassapput.
Qaffaassutaasut init iluarsaanneqartariaqalivissimasut 4,9 millioner koruunit missaannik nalillit matussusissavaat. SIK-mi siulittaasup ineqarnermut akiliutit qaffanneqarnissaat akerlerilluinnarpaa. Iluarsaassinissamulli aningaasanik suminngaanniit pissarsisoqarsinnaanersoq oqaatigisinnaannginnerarlugu:
- Iluarsaassinissamut aningaasat suminngaanniit pissarsiarineqarsinnaanersut naluara. Ilaasortattali atugarlioreeqisut pillaqqinneqarnissaat akuersaarsinnaanngilluinnarpara, Jess G. Bethelsen Sermitsiaq.AG-mut oqarpoq.
Jess G.: Aningaasarsianik qaffaaneq akinillu qaffaaneq imminnut ataqatigiinngillat
SIK kingullermik isumaqatiginninniarmat, SIK-mi ilaasortat tiimimusiaat 2,20 koruuninik qaffaaffigineqarput. Naalakkersuisut naatsorsuutigaat, ineqarnermut akiliutit 50 koruunit 560 koruunillu akornanni qaffanneqassasut.
- Tassa imaappoq, ilaasortatta ilaat ineqarnerminnut akiliuteqassagunik nalunaaquttap akunneranut 3,60 koruuninik akiliuteqarnerusalissapput. Tiimimusiallit aningaasarsiaasa 2,20 koruuninik qaffanneqarnissaat isumaqatigiissutigisimavarput. Ilaasortavut Nanortalimmiittut ineqarnerminnut akiliuteqassagunik nalunaaquttap akunneranut 1,65 koruuninik akiliuteqarnerusalissapput. Tamanna imminut ataqatigiinngilaq, SIK-mi siulittaasoq oqarpoq.
Jess G. Berthelsenip erseqqissaassutigaa, nalunaaquttap akunneranut 1 koruuni imaluunniit 50 øre SIK-mi ilaasortanut annertoorujussuusut. Ineqarnermut Naalakkersuisup Naaja Nathanielsenip (IA) ineqarnermut akiliutit qaffanneqarnissaanut tunngavilersuutigisimavaa iluarsaassinerit akissaqartinneqarnissaat:
- Najugaqarfiit missingersuutaat oqimaaqatigiissasut, taamaalillunilu aningaasartuutit isertitallu assigiissasut inatsisini ersarissorujussuarmik allassimavoq.
- Meeqqat eqqugaassasut
Ininik attartortut katillutik 2.887-iusut 2022-mi qaffaasoqarpat eqqugaasussaapput. Jess G. Berthelsenilu naapertorlugu meeqqat aamma eqqugaasussaapput.
- Angajoqqaat taamatut atugaqartinneqassappata meeqqat aamma eqqugaassapput. Akinik qaffaaniarneq unitsinngippassuk, qaffaatissatut innersuussat saniatigut aningaasarsiaqarnerulersitsinissaq piumasaqaatigissavarput, Jess G. Berthelsen oqarpoq.
Siulittaasup aamma paasiuminaatsippaa, SIK-mi ilaasortanit aningaasanik aalleriarluni aallerfigisinnarlugit qaleralinniat 17 millioner koruunit nalingannut appaaffigineqarniarnerat.
- Oqartoqarsinnaagunanngilarlu taakku atugaat ajorluinnartut, SIK-mi siulittaasoq naggasiivoq.