Jess G. Berthelsen: 'Ilaasortatta naammaginnikkunnaarnerat paasisinnaavara'
Sulisartut Inuussutissarsiuteqartut Kattuffianni, SIK-mi siulittaasup, Jess g: Berthelsenip, SIK-p immikkoortortaqarfiisa suliumajunnaarnermik oqariartuuteqarnerat paasisinnaavaa. Suliumajunnaarneq sakkuuvoq kingullertut atugassarput, oqarpoq.
SIK-p Namminersorlutik Oqartussat kommunillu akornanni akissarsiat pillugit isumaqatigiinniarnerit maanna uninngagallarput.
SIK-p ilaasortani sinnerlugit piumasaqaatit saqqummiutereerpai, oqartussalli tamanna akueriumanngilaat. Namminersorlutik Oqartussat agguaqatigiissillugu akunnermut 0,92 koruuninik qaffaajumapput. Illuatungeriit piumasaqaatit pillugit isummersorallarput, isumaqatigiinniarnerillu uninngagallarnerat nunatsinni immikkoortortaqarfinnit naammagineqanngilaq.
Illoqarfinni immikkoortortaqarfiit suliumajunnaarnissamik oqariartuuteqarput, siulittaasullu tamanna tupaallaatiginngilaa.
- Tupaallaatiginngilara. Ilaasortagut pitsaanerusumik atugaqartikkumallugit soorunami piumasaqassaagut, Jess G. Berthelsen Sermitsiaq.AG-mut oqarpoq.
Sulinermik Inuussutissarsiuteqartut Kattuffianni siulittaasup periuseq taanna siullertut atorusunngilaa. Suliumajunnaarneq aqqutissaasariaqarpoq kingullerpaaq, taanna isumaqarpoq.
- Soorunami assagut paarlallugit issiaannassanngilagut. Qanoq iliortariaqarpugut. Eqqaamassavarpulli suliumajunnaarnissaq sakkussaammat kingullerpaaq, Jess G. Berthelsen oqarpoq.
Akuerineqarsinnaanngitsoq
Illoqarfinni immikkoortortaqarfiit suliumajunnaarnissamik oqariartuuteqartut ulluni kingullerni amerligaluttuinnarput.
SIK-p Qaqortumi immikkoortortaqarfia, SIK-p Uummannami immikkoortortaqarfianut tapersiilluni tusagassiutinut nalunaaruteqartunut ilannguppoq.
- Ilaasortavut eqqarsaatigalugit akissaataasa maanna ima annikitsigisumik qaffaatissamik neqeroorneq sulisinnaasunik sulerusutsitsilernissaa akerlianiippoq, maannami pissutsit qiviaraanni pisortanit ikiorserneqarneq sulinermiit akilersinnaanerusutut isigineqarpoq nunatsinni, Jakob G-Motzfeldt tusagassiutinut nalunaaruteqarluni allappoq.
Ilaasortat atugassarititaat akuerineqarsinnaanngitsuusut SIK-mi siulittaasoq Jess G. Berthelsen isumaqarpoq. Taanna isumaqarpoq akissarsiat appasinnerat pisiassallu akisunerunerat pissutigalugit innuttaasut amerligaluttuinnartut nunanut allanut nuuttartut.
Taassumalli erseqqissarumavaa akissarsiat nammineerluni qaffassinnaanagit, oqartussat annertunerusumik tunniussiumanngippata.
- Namminersorlutik Oqartussanukarsinnaanngilanga kommuninukarlungalu aningaasaataannullu matuersaataannik arsaarlugit. Taakkuupput aningaasanik tunniussisussat, SIK-junngitsoq, ilaasortat tamanna eqqaamasariaqarpaat. Piumasaqaatigut saqqummiuppagut, tamanna akueriumanngilaat, naammaginanngilluinnarpoq, oqarpoq.
Taassuma Sermitsiaq.AG-mut ilisimatitsissutigaa SIK-mi siulersuisuunerit sapaatip akunnerata tulliata ingerlanerani ataatsimiissasut. Ataatsimiinnermi ilanngullugu oqaluuserineqassaaq immikkoortortaqarfiit suliumajunnaarumallutik oqariartuuteqarnerat. Tamannali tikinneqassanngitsoq, siulittaasup neriuutigaa.
- Isumaqatigiinniarnerit aallarteqqinnissaat neriuutigaara. Pisortat saaffiginninnissaat utaqqivara.