Jeremiassen: Ajornartoornermi ikiorsiissutissat naammanngillat
Aalisartunut piniartunullu ajornartoornermi aningaasaqarnikkut ikiorsiissutissat atuutereersut naammanngerujupput. Ajunaarnersuaqartillugu ikiorsiissutit atorneqarnissaat pisariaqartinneqartut, KNAPK-mi siulittaasoq isumaqarpoq.
Isumaginninnermut naalakkersuisoqarfik allakkiamik nassiussilluni nassuiaavoq aalisartut piniartullu isertitaarussimatillutik ajornartoornermi aningaasaqarnikkut ikiorsiissutinik kommunimut qinnuteqarsinnaasut.
Tamannali naammanngerujussuartoq KNAPK-mi siulittaasoq, Nikkulaat Jeremiassen isumaqarpoq. Taassuma erseqqissarpaa KNAPK-p isornartorsiuinini suli attatiinnaraa.
- Isumaginninnermut naalakkersiusoqarfiup ersarissareerpaa aalisartut piniartullu inuussutissarsiornerminni ajornartoornermi aningaasaqarnikkut ikiorsiissutinik pinissamut qinnuteqarsinnaareertut. Taanna naammanngila?
- Pisumi matumani aningaasaqarnikkut ikiorsiissutissat atuuttut naammanngerujussuarput. Aalisartut piniartullu piffissami sivitsortumi isertitaqarsimanngillat, ilaatigut sila pissutigalugu, taamaammat isumaqarpugut ajunaarnersuaqartoqarnerani ikiorsiissutissat atorneqartariaqartut, KNAPK-mi siulittaasoq Nikkulaat Jeremiassen nassuiaavoq.
Aalisarnermut piniarnermullu Naalakkersiusoq, Karl Tobiassen (S), Sermitsiaq.AG-mut nassuiaassuteqareerpoq aalisarnerup piniarnerullu iluani Naalakkersuisut arlalinnik suliniuteqartut. Piniagassanik pisassanillu Naalakkersuisut siunissamut qulakkeerinerat Nikkulaat Jeremiassenip nersulaarpaa.
- Taakkuli uani pinngilagut. Maanna isornartorsiuinerput ullumimut aqagumullu inuussutissaqartitsiniarnermut tunngassuteqarpoq. Taamaammat isornartorsiuterput attapparput, Nikkulaat Jeremiassen oqarpoq.
Naalakkersuisoq saaffiginnittariaqarpoq
Aalisartut piniartullu KNAPK-mut saaffiginnissutigisimasaat tamakkerlugit, KNAPK-miillu nassuiaateqartillugit naalakkersuisoqarfinnut akisussaasunut apuunneqartartut, siulittaasup erseqqissarpaa.
- Aalisarneq piniarnerlu inuussutissarsiutaapput nunatsinnik ingerlatitseqataasut. Naalakkersuisut ajunaarnersuaqartoqarnerani ikiorsiissutinik ammaanissamik iliuuseqarsinnaagaluarput, ataqqinninnertik taamaasiornikkut minnerpaamik takutissallugu. Saaffiginnissutit pisagut nassuiaaserlugit naalakkersuisumut nassiutereerpagut, apeqqutissaqaruni kattuffipput nammineerluni nassiuteriaannaavaa, Nikkulaat Jeremiassen oqarpoq.