Jeremiassen Canadaliarnissamut kaammattorneqarpoq
Piniarnermut Naalakkersuisoq, Nikkulaat Jeremiassen, qilalukkat qernertat pillugit oqaloqateqarnissaq siunertaralugu Canadaliaqqullugu, Naalakkersuisut kaammattorpaat.
Naalakkersuisut decembarip arfernani ataatsimiinnerminni, Nikkulaat Jeremiassen Canadamut paasisassarsiorluni angalanissaannik kaammattorpaat. Angalassaguni, qilalukkat qernertat aqunneqarneri pillugit Canadamiunik oqaloqateqarniassaaq.
Piniarnermulli Naalakkersuisup tulleriiaarinermini tamanna salliutippasinngilaa.
- Nikkulaat Jeremiassen ilisimatitsivoq kaammattuisoqarsimaneranik uppernarsaalluni. Kaammattuinerli tulleriiaarinermini salliutinngilaa, piffissamilu qaninnermi angalanissani naatsorsuutiginagu, Piniarnermut Naalakkersuisoqarfik mailikkut allappoq.
Naalakkersuisoqarfik ilisimatitsivoq Nikkulaat Jeremiassen angalassaguni, siunertarissangaa Nunavimmi Nunavummilu sumiiffimmi naalakkersuisunik oqaloqateqarnissaq.
Naalakkersuisoqarfiullu ilanngullugu ilisimatitsissutigaa eqqumaffigineqartoq Canadami qilaluartassiissutit naalagaaffeqatigiinnerup iluani aalajangersarneqartartut, sumiiffinni aalajangersimasuni aalajangersarneqartaratik.
Pisaqartoqarneranik nalunaaruteqartoqanngilaq
Ataatsimiinnermi decembarip arfernani ingerlanneqartumi aalajangerneqarpoq qilalukkat qernertanik pisassiissutit Upernaviup eqqaani 20-nik Qeqertarsuullu Tunuani 20-nik amerlineqassasut.
Naalakkersuisoqarfik ilisimatitsivoq pisasseeqqittoqareernerata kingorna suli qilalukkanik qernertanik pisaqartoqarsimanngitsoq.
Immikkut pisassiissuteqarneq ukiup naanissaanut atuuppoq.