Jens Napâtõk Inatsisartunit sulinngiffeqarnissamut qinnuteqartoq
Sapaatip akunnerata naanerani peqqarniitsumik pisoqareersoq, Naleraq sinnerlugu Inatsisartuni ilaasortaq Jens Napâtõk napparsimanini pissutigalugu nuna tamakkerlugu kommunimilu politikkeritut sulinngiffeqarnissaminik qinnuteqarsimavoq.
Naleraq tusagassiorfinnut nalunaaruteqarluni ilisimatitsivoq, ilaasortartik Jens Napâtõk napparsimanini pissutigalugu Inatsisartuni sulinngiffeqarnissaminut qinnuteqarsimasoq.
-Inatsisit atuuttut ataanni ingerlatsineq paquminaraluarsinnaasoq inuit ikiortariallit,
kinannguugaluartut kinarsuugaluartut ikiorserneqarnissaat ataqqillugu Naleqqamiit qinnuteqaat tiguarput. Eqqaamassavarput ikioqquneq aamma nukiummat – tamannalu ataqqillugu ilaqutariittut ingerlariaqqinnissaat ajunnginnerpaamik kissaallugit sulinngiffeqarnissaanut qinnuteqaat taperserparput, partii tusagassiorfinnut nalunaaruteqarluni allappoq.
Jens Napâtõk Sermitsiaq.AG-mut oqaluttuarpoq, ilaquttani tapersersorniarlugit sulinngiffeqarnissamik qinnuteqarsimalluni.
- Ilaqutariittut piffissami sivisuumi ikiorserneqarata ajornartorsiuteqarsimavugut. Ajornartorsiornerput arfininngormat sakkortuseqqippoq, tamannalu inuit attaveqaqatigiittarfiisigut aamma saqqummiunneqarluni, taanna oqarpoq.
Politiit ornigussimasut
Politiit nipiliortoqarpallaarnera pissutigalugu inaannut aggersarneqarsimapput. Taakku uppernarsarpaat, angerlarsimaffimmi meeqqat isiginnaartuliullugit eqqissiviilliortoqarsimanera pillugu suliaqarlutik
Assit videolu inuit attaveqaqatigiittarfiisigut ingerlaartinneqarut tunngaviusimapput, ullumi Inatsisartuni Siumut Demokraatillu sinnerlugit ilaasortat akerliullutik ataatsimiinnermit aniasimanerannut.
Jens Napaattuup ajornartorsiutip tamanit ilisimaneqalernera oqiliallaatigaa, naak inuttut inuunertik tamanut takusassiarineqaraluartoq oqimaakkaluaqisoq.
- Meeqqat oqimaatsunik atugaqarsimaqaat. Tamanna nanertuutigaara. Nuannaarutigaarali ikiorneqarnissamik pisariaqartitsinitsinnik nassueruteqarnerput. Tamanna oqitsuinnaanngilaq, taanna oqarpoq.
Aatsaat ajornartorsiuteqalinngitsut
Facebookikkut video takutinneqartupt susoqarnera takutippaa. Aappariit ernerata arfineq-marlunnik ukiullip pisoq filmiliarisimavaa. Aamma politikkerip aappaata kiinaa aagasaartoq pillugu asseq saqqummiunneqarsimavoq.
Sooq ernit filmiliortippiuk?
- Naluara. Aalakoorpunga ajornartorsiutinillu ulikkaarlunga. Aatsaat taamatut pisoqalinngilaq, Jens Napâtõk oqarpoq.
Aappat annersartarpiuk?
- Ilaqutariittut ingerlalluartutut pissuseqartarpugut, angerlarsimaffitsinnili ajornartorsiuteqarpugut. Aamma arlaleriarluta paasarlutalu immitsinnut ajattaattarpugut.
Politikkerip nassuiaatigaa, aappaata qullermik anaaseriarnermini qulliup aserornerani kiinaa kimillassimasoq, aamma annersarsimanngikkini.
- Ajornartorsiuteqaratta katsorsarneqartariaqartumik nassuerutigissavara. Ikiortissarsiorneq oqimaappoq, ikiortissarsiorpugulli. Neriuutigaara allat aamma ikiortissarsiornissaminnut tamanna tunngavigiumaaraat.