Jens Napaattuup periarfisseqqinneqarnini nuannaarutigaa
Jens Napaattooq Inatsisartunut qinersinermi 128-nik qinersisoqarluni Inatsisartunut ilaasortanngorpoq
- Qineqqusaarneq uannut pissaganarsimaqaaq. Siornatigummi kukkussuteqarsimavunga, taamaammat tatigineqarlunga politikkimi periarfisseqqinneqarnera nuannaarutigaara.
Jens Napaattooq Inatsisartunut qinigaaqqammertoq Sermitsiaq.AG-mut taama oqarpoq.
Piginnaatitaanermik atornerluisimasutut pineqaatissinneqarsimasoq
Jens Napaattooq 2005-imi ilassinnissutinik atornerluisimanini pissutigalugu Ineqarnermut Attaveqaqatigiinnermullu Naalakkersuisutut soraarsitaavoq.
Taanna piginnaatitaanermik atornerluisimasutut qaammatini sisamani pineqaatinneqarsimasut inissiisarfianniittusanngorlugu pineqaatissinneqarpoq, 2009-imilu isertitsivimmiilerluni.
- Politikkip uterfiginissaa tunuarsimaarfigisimavara, inuttaasulli arlallit qineqqusaaqqullunga kaammattortarsimavaannga, kukkussutigisimasakkalu ilinniutigisimavakka. Piffissaq kingulleq atorlugu qinigassanngortinnissara aalajangiuppara, Jens Napaattooq oqaluttuarpoq.
Upernavimmi najugaqartoq
Ukiut qulit missaanni Danmarkimi najugaqareerluni ukioq kingulleq nunatsinnut uterpoq. Danmarkimilu HF-eriarluni ilinniartitsisunngorniarluni. Massakkut Upernavimmi meeqqat atuarfiani ilinniartitsisuuvoq.
- Angerlarama isorliunerusuni allanngortoqarsimanngilaq, tamannalu akuersaarneqarsinnaanngilaq. Maanna ineriartornermi kikkut tamarmik peqataatinneqartariaqalerput, politikkerillu innuttaasunut isorliunerusuniittut ineriartornermut peqataarusunnerat tusaasariaqalerpaat, Jens Napaattooq erseqqissaavoq.
- Partiimik taarsiisimanernut suna peqqutaava?
- Politikkimik inissisimanera nalilersorsimavara. Partii Naleqqap nunaqarfiit isorliunerusullu sulissutigai, tamannalu uannut tulluuppoq. Ukiaq partiimut ilaasortanngorpunga, najukkamilu immikkoortoqarfimmi siulersuisunut suleqataallunga, Jens Napaattooq, siornatigut Siumumi ilaasortaasimasoq, akivoq.
- Inatsisartuni suliassarpassuaqarpugut, inuttaasullu oqariartuutigisimasaat Inatsisartuni ilaasortanut ingerlateqqinnissaat qilanaarivara, Jens Napaattooq oqarpoq.