Jens Immanuelsen: Uanga nipisattassiissutinik qaffaanngilanga

Nipisaat suaannik pisassiissuutit qaffanneqarnissaannik aalajangiisoqartillugu, nuannareqqusaanermut akerliusumik unammisoqartutullusooq pisoqarpoq. Aalajangerneq aalisarnermik ingerlatsisunit akerlilerneqarsimavoq, aamma MSC-mik allagartaateqarnerup ulorianartorsiortinneqarsinnaanera oqaluuserineqarsimavoq.

Inatsisartut Aalisarnermut, Piniarnermut Nunalerinermullu Ataatsimiititaliaata, Naalakkersuisoq Jens Immanuelsen (S) nipisattassiissutit sapaatip akunnerani matumani 1159 tonsiniit 1363 tonsinut qaffammagit isornartorsiungaatsiarpaa.

- Aalisarnermut, Piniarnermut Nunalerinermullu Naalakkersuisup naak ilisima­galuarlugu MSC-mut nalilersuut ulorianartorsiortissinnaallugu nipisaat suaannik immikkut pisasseeqqissimanera isornartorujussuusoq akuerineqarsinnaanngit­sorlu ataatsimiititaliaq isumaqarpoq, Jens Immanuelsenip parteeqataata, ataatsimiititaliami siulittaasup Henrik Fleischerip atsiorsimasaani oqaaseqaat taamatut nipeqarpoq.

Akisussaaqatigiittut

Naalakkersuisulli taamatut isornartorsiorneqarnini akueriumanngilaa. Tusagassiorfinnut nalunaaruteqarnermi erseqqissaatigaa, pisassiissutinik qaffaaneq nammineerluni kisimi akisussaaffiginnginnamiuk.

- Matumuuna erseqqissaatigineqassaaq Ataatsimiititap oqaaseqarnera eqqortuun­ngimmat tassami, Aalisarneq pillugu inatsit naapertorlugu Naalakkersuisut tamarmiullutik pisassiissutinik aalajangersaasinnaatitaammata, tamannalu Aali­sar­nermut, Piniarnermut Nunalerinermullu Naalakkersuisumit aalajangiivigine­qarsinnaanngimmat, Jens Immanuelsen allappoq.

Taamaalilluni isornartorsiut Naalakkersuisunut tamarmiusunut ingerlateqqinneqarpoq.