Jens Immanuelsenip tatiginnikkunnaarneq malinnianngilaa

Aalisarnermut Ataatsimiititaliami amerlanerussuteqartut Aalisarnermut Naalakkersuisumut Jens Immanuelsenimut tatiginnikkunnaaraluartut, naalakkersuisoq atuuffimminit nammineerluni tunuarnianngilaq.

Aalisarnermut Naalakkersuisoq Jens Immanuelsen illuatungiliuttut Siumumilu ilaasortat pingasut pingasunngormat tatiginnikkunnaarnerminnik nalunaaruteqartut akissuteqarfigivai.

Aalisarnermut Naalakkersuisoqarfimmit nalunaarummik imatut allattoqarpoq:

- Aalisarneq pillugu Ataatsimiititaliarsuaq tamanut saqqummiunneqarnikunik suliassaqarluni Naalakkersuisunit pilersinneqarpoq, Aalisarneq pillugu Ataatsimiititaliarsuullu isumaliutissiissutissaata saqqummiunneqarnissaa tamatumalu kingorna politikkikkut oqallisigineqarnissaa Naalakkersuisut allat assigalugit qilanaaraat. Taamaattumik periusissanik suliassanilluunniit pingaarnersiukkanik Aalisarneq pillugu Ataatsimiititaliarsuarmut innuttaasunulluunniit Naalakkersuisut isertuusassaqanngillat.

Jens Immanuelsen itisiliilluni Aalisarneq pillugu Ataatsimiititaliarsuup suleriaasia nassuiarpaa:

- Aalisarneq pillugu Ataatsimiititaliarsuup suleriaasia pissutigalugu Aalisarneq pillugu Ataatsimiititaliarsuup suliai eqqarsaatigalugit Naalakkersuisut Aalisarnermut Ataatsimiititaliamit ilisimasaqarnerunngillat. Aalisarneq pillugu Ataatsimiititaliarsuup oqallisissiaanik Naalakkersuisut Aalisarnermut Ataatsimiititaliaq innuttaasullu assigalugit saqqummiussivigineqarnikuupput. Aalisagaativut – atugarissaarnerput. Aalisarneq pillugu Ataatsimiititaliarsuup oqallisissiaminik saqqummiussiniarluni Aalisarnermut Ataatsimiititaliamik aggersaasimasoq ilisimatinneqarpunga, tamannali ataatsimiititaliap siulittaasuanit ilaasortanillu allanit peqataaffigineqarusussimanngilaq. Aalisarnermut Ataatsimiititaliap periarfissamik taassuminnga atuerusussimannginnera Naalakkersuisunut akisussaaffigineqalersinniarneqarsinnaanngilaq.

Nalinginnaasumik suleriaaseq

- Periutsit nalinginnaasut naapertorlugit inatsisinut tunngatillugu suliassanut ataatsimiititaliaq aatsaat akuutinneqalersarpoq inatsisissatut siunnersuut periareeraangat. Aalisarneq pillugu Ataatsimiititaliaasup oqallisissiaat aammalu isumaliutissiissutissaa aasamut saqqummersussaq eqqarsaatigalugit Aalisarnermut Ataatsimiititaliaq suliamut siusissukkut akuutinneqarsinnaanissaminut periarfissinneqarsimagaluarpoq, Ataatsimiititaliarsuullu isumaliutissiissutaa aqqutigalugu poltikkikkut suliarinissaanut tamatta pitsaasunik tunngavissaqalersussaavugut.

Jens Immanuelsenip erseqqissaatigaa, aalisarnermut ataatsimiititaliap siunersiueqatigiinnissamut arlalitsigut qaaqqusineranut peqataasarsimalluni.

- Aalisarnermut Ataatsimiititaliap siunnersueqatigiinnissamut aggersaanerinut arlalinnut akuersaarlunga takkuttarsimavunga ataatsimiititaliallu siunnersueqatigiinnerup nalaani tamatumalu kingorna apeqqutigisai tamaasa akissuteqarfigisarsimallugit. Akissutigisarsimasakka ataasiarlungaluunniit allanngortittarsimanngilakka, taamaattumillu Aalisarnermut Ataatsimiititaliap ataatsimiititaliamut assigiinngisitaartunik akissuteqartarsimaninnik oqariartuuteqarnera paasisinnaanngilara. Aalisarnermut Ataatsimiititaliaq paasissutissanik annertunerusunik kissaateqaruni matora ammammat apeqqutigiunnagaasa saaffiginnissutigiunnagaasalu akisarnissaanut piareersimavunga, Jens Immanuelsen erseqqissaalluni oqarpoq.

Powered by Labrador CMS