Dansk Folkepartip Kalaallit Nunaannut oqaaseqartartuata Søren Espersenip Saammaateqatigiinnermut Kommissioni quianaannartutut taavaa. Isumaqarporlu pilersinneqarsimanngisaannarsimassagaluartoq.

Maanna Saammaateqatigiinnermut Kommissionimut ilaasortap aappaata Jens Heinrichip Kalaallit Nunaannut oqaaseqartartup isornartorsiuinera akissuteqarfigaa.

– Siullermik DF, pingaartumillu Søren Espersen, nersualaassavakka Kalaallit Nunaannut isummermata. Qallunaat politikeriisa Kalaallit Nunaanut tunngasut imaluunniit Danmarkip Kalaallillu Nunaata akornanni pissutsit attorumanngippallaartaqaat.

Jens Heinrichip oqaaseqaanni taamatut aallartippaa, erseqqissarlugulu attaveqaqatigiinnginneq ataatsimooqatigiinnermi pitsaasuunngitsoq.

Kalaallit ingerlataat

– Isumaqanngilanga Saammaateqatigiinnermut Kommissioni kukkunerusoq, taamaattumik kikkut tamarmik taamatut isumaqanngillat. Ilumoorpoq qallunaat naalakkersuisui nikerartut peqataajumanngimmata, Saammaateqatigiinnermulli Kommissioni kalaallit aningaasanut inatsisaanniippoq taamaasillunilu Inatsisartunit tapsersersorneqarluni, Jens Heinrich allappoq.

Taassuma erseqqissarpaa taanna kalaallit namminneq ingerlatarigaat, takutitsisoq Kalaallit Nunaat kalaallillu akisussaassuseqsrusuttut ingerlaqqikkusullutillu.

Nunasiaateqarnermut namminneq oqaluttuassartaat

´Danmarki pisortatigoortumik Saammaateqatigiinnermut Kommissionimut peqataajumanngimmat tamanna takussutissanerugunarpoq qanga kommissionip qanoq saqqummiunneqarsimanera, ilisimaneqaleriartorpallu taama ulorianartiginngitsoq, isiginninneq immaqa allanngussaaq.

Oqaluttuarisaanermik isiginninnerup allanngortinneratigut saniatigut pissarsiassaasinnaavoq Danmarkip qallunaallu aamma nutaamik takusinnaalissagaat nunasiaateqarnermik namminneq oqaluttuassartartik Kalaallillu Nunaanni nutaaliaasumi inissisimanertik. Nunat taakkua inuiaallu taakkua marluk akornanni pissutsit, qanorluunniit pisoqaraluarpat nukittorsarneqassapput, tamatumani aamma peqatigiissinnaagaanni ingerlaqqillunilu.´

Taamatut ilaatigut Søren Espersenip kommissionimik isornartorsiuineranik oqaaseqaatitut allappoq Saammaateqatigiinnermut Kommissionimut ilaasortaq Jens Heinrich.