Jens-Frederiup politikkikkut suliani siulleq naammassigaa
Demokraatit siulittaasuata Inuussutissarsiornermut Naalakkersuisunngorlaap Jens-Frederik Nielsenip, politikkikkut suliani siulleq sisamanngormat naammassivaa, tassaasoq takornariartitsinermik inuussutissarsiuteqartunut ingerlatassat, takornariat nunanit allaneersut aningaasaatilissuit amigaataaneranni.
Jens-Frederik Nielsenip Sermitsiaq.AG-mit apersorneqarnermini isertuutinngilaa, isumaqatigiissutip takornariaqarnerpaaffiusartup aallartivinnginnerani Aningaasaqarnermut Ataatsimiititaliamit akuerineqartussap naammassillugu suliarineqarnera nuannaarutigilluinnaramiuk.
Taamaalilluni ikiorsiissutit atuutereersut ullualunnguit atorunnaartussat, septemberip qaammataata naaneranut sivitsorneqarput. Ilanngullugu takornariartitsinermik inuussutissarsiuteqartunut ingerlatassat atuutsinneqalerput.
- Takornariartitsinermik inuussutissarsiuteqartut aniguinissaasa qulakkeernearnissaa pingaarnerpaasimavoq. Tamattami nalunngilarput, suliffeqarfiit isaatitsinissaminnut ajornartorsiorluinnartut, piffissarlu takornariaqarfiunerpaasartoq qallilluinnarsimalluni. Taamaammat nuannaarutigaarput, takornariaqarfiunerpaasartup takkutinnginnerani tamanna inississinnaagatsigu.
Aningaasanik asuli tunniussuiinnarnianngitsoq
- Corona qaangiuppat takornariartitsisartut ineriartortitsinissaminnut piareersimassapput, Jens-Frederik Nielsen immikkut ittumik ikiorsiissuteqarnermut pissutaasoq pillugu Sermitsiaq.AG-mut oqarpoq.
Takornariartitsinermik inuussutissarsiuteqartunut ingerlatassanut 88 millioner koruunit immikkoortinneqarsimapput, taakku akunnittarfinni unnuinernut nunamilu takornarianik angallassinernut akikillisaataassapput.
Naalakkersuisup erseqqissaatigaa, ikiorsiissutissat pineqartut Naalakkersuisut inuussutissarsiortunut taakkununnga tatineqarsimaqisunut ikiorsiissutiginiagaasa imaassinnaasoq kingullersarinngikkaat:
- Aningaasanik kikkunnut tamanut tunniussuinianngilanga, ingerlatsinerunissamulli kajumissuseqartitserusuppunga, Jens-Frederik Nielsen oqarpoq.
Aningaasarsiassanut taarsiissutissanit aningaasat nuunneqartut
88 millioner koruunit taakku, suliffeqarfiit aningaasarsianut taarsiissutissaannut 107 millioner koruuniusunit tigusaapput. Aningaasarsiassanulli taarsiissutissanit maannamut 6,7 millioner koruunit taamaallaat atorneqarsimapput, taamaammat Naalakkersuisut aalajangersimapput takornariartitsinermik inuussutissarsiuteqartunut ingerlatassat aningaasaliiffiginiarlugit.
Aningaasarsiassanut taarsiissuteqarnissamik aaqqissuussaq aamma septemberip 30-anut sivitsorneqarpoq. Aaqqissuussamit aningaasat peerneqaraluartut, sivitsuinissamut aningaasat naammattut nalilernqarsimavoq.
Aningaasaqarnermut Siunnersuisoqatigiit Kalaallit Nunaata aningaasaqarnera pillugu immikkut ittumik nalunaarusiaminni inassutigisimavaat, inuussutissarsiuteqartunut ikiorsiissutit piaarnerpaamik atorunnaarsikkiartorneqassasut, paarlaallugulu takornariatitsinermik inuussutissarsiuteqartut siunnerfigalugit iliuuseqartoqassasoq.
Jens-Frederik Nielsenip oqaatigaa, takornariartitsisartut akunnittarfiutillillu ikiorsiissutinik atuinerusimasut, Naalakkersuisullu taamaammat ikiorsiissutinik allanik allannguinissaq pisariaqarsorisimanngikkaat - sivitsuiinnarsimasulli.